އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން ދިވެހިރާއްޖޭގެ ޤައުމީ ޔުނިވަރސިޓީ (އެމް.އެން.ޔޫ) އިން، ޢާއިލީ އަދި އިޖުތިމާޢީ އެއްބައިވަންތަކަން ހަރުދަނާ ކުރުމާއި ގުޅޭ ގޮތުން މަޝްވަރާ ބައްދަލުވުމެއް ބާއްވައިފިއެވެ.

އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން ވިދާޅުވީ، މި މެއި މަހުގެ 29 ވަނަ ދުވަހު ބޭއްވި މި ބައްދަލުވުމަކީ ޢާއިލާތަކަށް އެހީތެރިވެ، އިޖުތިމާޢީ އެއްބައިވަންތަކަން ކުރިއެރުވުމަށް އެހީތެރިވުމަށްޓަކައި ކުރެވޭނެ ކަންކަން  ދެނެގަނެ، މަޝްވަރާކުރުމަށް ބޭއްވި ބައްދަލުވުއް ކަމަށެވެ.

މި ބައްދަލުވުމުގައި އިޖުތިމާޢީ މަދަދުވެރިން ނުވަަތަ ސޯޝަލް ވޯކަރުން  ތަމްރީނުކުރުމާއި ގުޅޭ ގޮތުން، އެމް.އެން.ޔޫ އާއިއެކުގައި މަޝްވަރާކުރެވިފައިވާ ކަމުގައި އެވުޒާރާއިން ވިދާޅުވިއެވެ. މިގޮތުން ގޮންޖެހުންތަކާ ކުރިމަތިލާން ޖެހިފައިވާ ޢާއިލާތަކަށް އެހީތެރިވުމުގައި އިޖުތިމާޢީ މަދަދުވެރިންގެ މުހިންމު ދައުރު ދެނެގަނެ، އެފަރާތްތަކުގެ ޤާބިލިއްޔަތު އިތުރުކުރުމަށް ޚާއްޞަ ތަމްރީނު ޕްރޮގްރާމްތައް ހިންގުމަށް ނިންމާފައިވާ ކަމުގައިވެސް އެވުޒާރާއިން ވިދާޅުވިއެވެ. މި ތަމްރީނުތަކުގެ އަމާޒަކީ މިފަދަ ފުރުޞަތުތަކުގެ  ޒަރީޢާއިން، އެފަރާތްތަކަށް ބޭނުންވާ ހުނަރާއި ޢިލްމު ލިބި، މުޖުތަމަޢުގައި އެހީތެރިކަމަށް ބޭނުންވެފައިވާ ޢާއިލާތަކަށް ފުރިހަމަ އެހީތެރިކަން ފޯރުކޮށްދޭނެ ޚިދުމަތްތެރިން ބިނާކުރުން ކަމަށެވެ.

މީގެއިތުރުން، ⁠ޢާއިލީ ގިޔަމު (ފެމިލީ ވެލިއުސް) ތަކާއި، ޢާއިލާތައް ރޫޅިގެންދާ ސަބަބުތަކާއި، އެކަމުގެ ސަބަބުން ކުޑަކުދިންނާއި، ޢާއިލާތަކާއި، މުޖުތަމަޢަށް ކުރާ އަސަރު ދެނެގަތުމާ ބެހޭގޮތުން ޤައުމީ ފެންވަރުގެ މަޝްވަރާއެއް ބޭއްވުމަށްވެސް މި ބައްދަލުވުމުގައި މަޝްވަރާކުރެވުނު ކަމުގައިވެސް އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން ވަނީ ވިދާޅުވެފައެވެ. މިގޮތުން މި މަޝްވަރާތަކުގެ ހޯދުންތައް ޤައުމީ މަހާސިންތާއެއްގައި ހުށަހަޅައި، ޢާއިލާތައް އިތުރަށް ހަރުދަނާކޮށް، ޢާއިލީ ގުޅުން ބަދަހިކުރުމަށް މިހާރު ހުރި ނިޒާމްތަކާއި، އަދި މުސްތަޤްބަލުގައި ޤާއިމް ކުރާ ނިޒާމުތައް އިތުރަށް ހަރުދަނާކުރުމާއި ގުޅޭ ގޮތުންވެސް މަޝްވަރާކޮށް ޚިޔާލު ބަދަލުކުރެވުނު ކަމުގައ އެވުޒާރާއިން ވިދާޅުވިއެވެ.

ހަމަ މިއާއެކު، ޢާއިލީ ގުޅުންތަކާއި އިޖުތިމާޢީ އެއްބައިވަންތަކަން ކުރިއެރުވުމާއި ގުޅޭ ގޮތުންވެސް މަޝްވަރާކޮށްފައިވާ ކަމަށާއި، މިގޮތުން ޢާއިލާތައް ރޫޅުމުން ކުރިމަތިވާ އިޖުތިމާޢީ މައްސަލަތައް މަދުކޮށް، އެއްބައިވަންތަ އަދި އޯގާތެރި މުޖުތަމަޢެއް ބިނާކުރުމުގެ މުހިންމުކަމާއި، އެކަން ހާސިލުކުރުމަށް ކުރެވިދާނެ ކަންކަމުގެ މައްޗަށްވެސް ވަނީ އަލިއަޅުވާލެވިފައި ކަމުގައި އެ ވުޒާރާއިން ވަނީ ވިދާޅުވެފައެވެ.

އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން ވިދާޅުވީ، މިފަދަ ކޮންމެ ބައްދަލުވުމެއްގެ މަޤުޞަދަކީ، ޢާއިލާތަކާއި މުޖުތަމަޢުގެ ދުޅަހެޔޮކަން އިތުރުކޮށް، އެހީތެރިކަމުގެ ނިޒާމުތައް ވަރުގަދަކޮށްގެން، އަބުރުވެރި، އުފާވެރި ދިރިއުޅުމެއް އުޅުމަށް ޢާއިލާތައް ބާރުވެރިކުރުވުން ކަމަށެވެ.