މިއަހަރުގެ އެއްމިިލިޔަންވަނަ ފަތުރުވެރިޔާ މިއަދު ރާއްޖެ އަތުވެއްޖެއެވެ. 

އެއްމިލިއަން ވަނަ ފަތުރުވެރިޔާއަށް މަރުޙަބާ ކިޔުމުގެ ގޮތުން، ވެލާނާ އިންޓަރނޭޝަލް އެއާޕޯޓް ހިންގާ މޯލްޑިވުސް އެއާޕޯޓްސް ކޮމްޕެނީ ލިމިޓެޑާއި، އެމްއެމްޕީއާރްސީ އަދި ޓޫރިޒަމް މިނިސްޓްރީން ވަނީ ޚާއްޞަ ހަރަކާތެއް ބާއްވާފައެވެ.

އެއްމިލިޔަން ވަނަ ފަތުރުވެރިއަކީ، ރަޝިޔާގެ ރައްޔިތެއްކަމުގައިވާ، އެންޓޯން ޕެވްލޯވްއެވެ. އޭނާއައީ އާއިލާއާއެކުގައެވެ. އެންޓޯން ޕެވްލޯވްއަށާއި އާއިލާއަށް، މަރުހަބާ ވިދާޅުވީ، ޓޫރިޒަމް މިނިސްޓަރު އަބްދުﷲ މައުސޫމާއި އެމްއެމްޕީއާރުސީގެ އިސްބޭފުޅުންނާއި އެއާޕޯޓުގެ އިސްވެރިންނެވެ.

މިއީ މިރާއްޖެއަށް އަހަރެއްގެ ތެރޭގައި އެއްމިލިޔަން ފަތުރުވެރިން އަންނަންފެށިފަހު، އަހަރުގެ ޖުލައިމަހުގެ ތެރޭގައި މިއަދަދަށް ވާޞިލްވެވުނު ފުރަތަމަ އަހަރެވެ. މިއަހަރު އަދި 5 މަސްދުވަސް ބާކީ އޮތް އިރު، ސަރުކާރުން އަންދާޒާކޮށްފައި ވަނީ، މިއަހަރު ރާއްޖެއަށް 1.9 މިލިޔަން ފަތުރުވެރިން އަންނާނެ ކަމަށެވެ.

ޔޫރަޕްގައި ހަނގުރާމަ ހިނގަމުން ދިޔަ ނަމަވެސް، ރަޝިޔާއިން އެކަނިވެސް މިއަހަރުގެ މިހާތަނަށް ރާއްޖެއަށް 115،300 ފަތުރުވެރިން ވަނީ އައިސްފައެވެ.