ތަރައްޤީވަމުން އަންނަ ކުދިޖަޒީރާ ޤައުމުތަކުގެ ހަތަރުވަނަ ބައިނަލްއަޤްވާމީ ކޮންފަރެންސްގައި ރާއްޖެއިން ޙާސިލްކުރަން ބޭނުންވި ކަންކަން ޙާޞިލްވެފައިވާ ކަމުގައި، ރައީސުލްޖުމްހޫރިއްޔާގެ އޮފީހުގެ ޗީފް ސްޕޯކްސްޕަރސަން ހީނާ ވަލީދު ވިދާޅުވެއްޖެއެވެ.

އިއްޔެ ރައީސުލްޖުމްހޫރިއްޔާގެ އޮފީހުގައި ވަނީ، ތަރައްޤީވަމުން އަންނަ ކުދިޖަޒީރާ ޤައުމުތަކުގެ ހަތަރުވަނަ ބައިނަލްއަޤްވާމީ ކޮންފަރެންސްގައި ރާއްޖެއިން އަދާކުރި ދައުރާއި އަދި ރާއްޖެއިން ހުށައެޅި ކަންކަމާއި ގުޅޭ މައުލޫމާތު ދިނުމަށް ނޫސްކޮންފަރެންސެއް ބާއްވާފައެވެ.

ނޫސްވެރިންގެ މި ބައްދަލުވުން ފައްޓަވަމުން ރައީސުލްޖުމްހޫރިއްޔާގެ އޮފީހުގެ ޗީފް ސްޕޯކްސްޕަރސަން ހީނާ ވަލީދު ވިދާޅުވީ ސިޑްސް ކޮންފަރެންސްއަކީ ވަރަށް ކާމިޔާބު ކޮންފަރެންސްއެއް ކަމަށެވެ.

ހީނާ ވިދާޅުވީ، ހަތަރުވަނަ ބައިނަލްއަޤްވާމީ ކޮންފަރެންސްގައި ދިވެހިރައްޔިތުންނަށް މުހިންމު އެކިއެކި ކަންކަމުގައި ރައީސުލްޖުމްހޫރިއްޔާ ވަކާލާތު ކުރެއްވިކަމަށެވެ. އަދި މޫސުމަށް އަންނަ ބަދަލުތަކުން އަރައިގަތުމަށް ކުރަމުންދާ މަސައްކަތްތަކާއި ތަރައްޤީވަމުން އަންނަ ކުދި ޖަޒީރާ ޤައުމުތަކަށް ކުރިމަތިވާ ގޮންޖެހުންތަކާ ގުޅޭގޮތުންވެސް މި ކޮންފަރެންސްގައި ރައީސުލްޖުމްހޫރިއްޔާ ވާހަކަފުޅު ދެއްކެވިކަން ހީނާ ފާހަގަކުރެއްވިއެވެ.

ހީނާ ވިދާޅުވީ، ރައީސުލްޖުމްހޫރިއްޔާ ސިޑްސް ކޮންފަރެންސްގެ ތެރޭގައި ދެއްވުމަށް ހަމަޖައްސަވާފައި އޮތް ހަތް ސްޓޭޓްމެންޓްވެސް ދެއްވާފައި ވާކަމަށެވެ. 

މީގެ އިތުރުން، ތަރައްޤީވަމުން އަންނަ ކުދިޖަޒީރާ ޤައުމުތަކުގެ ހަތަރުވަނަ ބައިނަލްއަޤްވާމީ ކޮންފަރެންސްގެ ހަވާސާގައި ޤައުމުތަކުގެ އިސްވެރިންނާއި، އަދި އދ.ގެ ސެކްރެޓަރީ ޖެނެރަލްއާއިވެސް ރައީސުލްޖުމްހޫރިއްޔާ ބައްދަލުކުރެއްވިކަން ހީނާ ވަނީ ފާހަގަކުރައްވާފައެވެ.

ސިޑްސް ކޮންފަރެންސްގައި ބައިވެރިވެވަޑައިގެންނެވުމަށް ރައީސުލްޖުމްހޫރިއްޔާ ކުރެއްވިވި ދަތުރުފުޅު ނިންމަވާލެއްވުމަށްފަހުގައި އެމަނިކުފާނު މިރޭ މާލެ ވަޑައިގަންނަވާނެއެވެ.