ޖަރުމަނުގެ އެންމެ ކާމިޔާބު ޓީމު ކަމުގައިވާ ބެޔާން މިއުނިކުގެ އައު ކޯޗަކަށް، ބެލްޖިއަމްގެ ވިންސެންޓް ކޮމްޕެނީ ހަމަޖައްސައިފިއެވެ. ބެޔާންއާ ކޮމްޕެނީ މި ހަވާލުވީ 3 އަހަރުގެ ކޮންޓްރެކްޓެއްގައެވެ.

ފާއިތުވި ދެ ސީޒަންގައި ކޮމްޕެނީ ހަވާލުވެހުރީ އިނގިރޭސި ކްލަބެއް ކަމުގައިވާ އެފް.ސީ. ބާންލީއާއެވެ. ބާންލީއަކީ ކޮމްޕެނީގެ މެނޭޖީރިއަލް ކެރިއަރުގެ ފެށުމެވެ.

ބާންލީގެ މެނޭޖަރެއްގެ ހައިސިއްޔަތުން ކޮމްޕެނީ އެ ޓީމާ ގުޅުނީ 2022 ވަނަ އަހަރުއެވެ. އޭރު އެ ކުލަބު އޮތީ ޗެމްޕިއަންޝިޕްގައެވެ. އެއީ އިނގިރޭސި ދެވަނަ ޑިވިޝަނެވެ. އަދި އޭނާގެ ފުރަތަމަ ސީޒަނުގައި އޭނާ ވަނީ އެ ޓީމު ޕްރިމިއަ ލީގަށް ގެނަސްދީފައެވެ. ނަމަވެސް ނިމިދިޔަ ސީޒަނުގައި އަނެއްކާ ވެސް އެ ޓީމު މިވަނީ ޗެމްޕިއަންޝިޕަށް ރެލިގޭޓްވެފައެވެ.

ބެޔާންގެ ކޯޗުގެ މަގާމަށް ކޮމްޕެނީ އައްޔަނު ކުރުމަށްފަހު އެ ކްލަބުގެ ސީ.އީ.އޯ. ޖޭން ކްރިސްޓިއަން ޑްރީސެން ބުނީ، ކޮމްޕެނީއަކީ ބެޔާންގެ އެ މަގާމަށް އެންމެ އެކަށީގެންވާ ކެނޑިޑޭޓު ކަމަށާއި، އޭނާއާއިއެކު މަސައްކަތް ކުރުމަށް ކެތްމަދުވެފައި ހުރި ވާހަކައެވެ.

ކުޅުންތެރިއެއްގެ ގޮތުގައި ކޮމްޕެނީ އޭނާގެ އެންމެ ކާމިޔާބު ދުވަސްތައް ހޭދަކުރީ މެންޗެސްޓާ ސިޓީގައެވެ. އެ ކުލަބުގައި އޭނާ ވަނީ 11 އަހަރު ހޭދަކޮށްފައެވެ. އަދި ސިޓީއިން ޕްރިމިއަ ލީގު އަލަށް ކާމިޔާބުކުރި އިރު ކޮމްޕެނީ ވަނީ މުހިންމު ދައުރެއް އަދާކޮށްފައެވެ. މީގެ އިތުރުން، ސިޓީއާއެކު އޭނާ ވަނީ ލީގު ކަޕް 4 ފަހަރަށް ކާމިޔާބުކޮށް، އިނގިރޭސި އެފްއޭ ކަޕާއި އެފްއޭ ކޮމިއުނިޓީ ޝީލްޑް ދެފަހަރަށް ކާމިޔާބުކޮށްފައެވެ.