ރާއްޖޭގެ ސަރަހައްދުގައި ހުޅަނގު މޫސުމްގެ ބާރު ގަދަވުމާއި ގުޅިގެން ކުރިޔަށް އޮތް ތިން ދުވަހުވެސް ރާއްޖެއަށް މޫސުމް ގޯސްވާނެ ކަމުގައި މޫސުމާއި ބެހޭ ޤައުމީ އިދާރާއިން ވިދާޅުވެއްޖެއެވެ.

މެޓް އޮފީހުން ވިދާޅުވީ، ކުރިޔަށް އޮތް ތިން ދުވަހުވެސް ގަދަ ވަޔާއެކު ބޯކޮށް ވާރޭ ވެހޭނެ ކަމަށް ލަފާކުރެވޭ ކަމަށާއި ކަނޑުތައްވެސް ވަރަށް ގަދަ ވާނެ ކަމަށް ލަފާކުރެވޭ ކަމަށެވެ. މިގޮތުން އާއްމު ގޮތެއްގައި 15 މޭލާއި 25 މޭލާއި ދެމެދުގެ ބާރު މިނުގައި ވައިޖެހޭނެ ކަމަށާއި، ވިލާގަނޑުގައި ގަޑިއަކު 45 މޭލާއި 55 މޭލާއި ދެމެދަށް ވައިގަދަވާނެ ކަމަށް ލަފާ ކުރެވޭ ކަމަށެވެ. މީގެ އިތުރުން ދިޔަވަރު ބޮޑުވާ ވަގުތުތަކުގައި ބައެއް ރަށްތަކަށް އުދަ އެރުމަކީވެސް އެކަށީގެންވާ ކަމެއް ކަމުގައި، މޫސުމާއި ބެހޭ ޤައުމީ އިދާރާއިން ވިދާޅުވެފައި ވެއެވެ.

ރާއްޖޭގެ ސަރަހައްދުގެ މޫސުމް ކުރިޔަށް އޮތް ތިން ދުވަހުވެސް ގޯސްވާނެތީ، ކަނޑު ދަތުރުފަތުރު ކުރައްވާ ފަރާތްތަކުން މޫސުމަށް ބަލައިގެން ދަތުރު ކުރެއްވުމަށާއި، ދިމާވެދާނެ ނުރައްކާތެރި ހާލަތްތަކުން ސަލާމަތްވެ ތިބުމަށް ދުރާލައި ފިޔަވަޅު އެޅުއްވުމަށްވެސް މެޓް އޮފީހުން ވަނި އިލްތިމާސްކުރައްވާފައެވެ.