ރައްޔިތުންގެ މަޖިލީހުގެ ރައީސް ކަމުގެ މަޤާމަށް ޢަބުދުއްރަހީމް އިންނެވުމަށް ތާއީދު ނުކުރައްވާ ޕީއެންސީގެ މެމްބަރުން ތިއްބެވިކަން މަޖިލިސް ރައީސް އިންތިޚާބު ކުރުމަށް ނެގި ސިއްރު ވޯޓުގައި ހާމަވެއްޖެއެވެ.

ސަރުކާރަށް ތާއީދު ކުރައްވާ މެމްބަރުންނާއި، އެކު ރައްޔިތުންގެ މަޖިލީހުގައި ޕީއެންސީގެ ސުޕަރ މެޖޯރިޓީގެ އަދަދަކީ، 79 އެވެ. ޕީއެންސީގައި އެކަނިވެސް 75 މެމްބަރުން އެބަ ތިއްބެވިއެވެ. އެހެން ނަމަވެސް މަޖިލީހުގައި ނެގި ސިއްރު ވޯޓުގައި އަބްދުއްރަޙީމަށް ލިބިވަޑައިގެންނެވީ، 71 ވޯޓެވެ. ބާޠިލް 7 ވޯޓު އޮތެވެ.

މަޖިލީހުގެ ރައީސް އިންތިޚާބު ކުރުމަށް ނެގި ސިއްރު ވޯޓުގައި ޕީއެންސީއާއި ސަރުކާރަށް ތާއީދު ކުަރައްވާ ހުރިހާ މެމްބަރުން ބައިވެރިވެވަޑައިގެންނެވި އިރު، އެވޯޓުގައި ބައިވެރިވެވަޑައި ނުގަންނަވާ ހަމައެކަނި މެމްބަރަކީ މަޖިލީހުގެ ރިޔާސަތުގައި އިންނެވި، އެމްޑީއޭގެ ލީޑަރު އަދި ރައްޔިތުންގެ މަޖިލީހުގެ މީދޫ ދާއިރާގެ މެމްބަރު އަޙްމަދު ސިޔާމެވެ.

ރައްޔިތުންގެ މަޖިލީހުގެ ރައީސް ކަމުގެ މަޤާމަށް، ޢަބްދުއްރަހީމް އަދި ނައިބު ރައީސް ކަމުގެ މަޤާމަށް ދިއްގަރު ދާއިރާގެ މެމްބަރު އަޙްމަދު ނާޒިމް ހޮއްވެވުމަށް ތާއީދު ކުރައްވާ ކަމުގައި، ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު ވަނީ ހާމަކުރައްވާފައެވެ. އެހެން ނަަމަވެސް މަޖިލީހުގައި މިއަދު ނެގި ސިއްރު ވޯޓުގެ ނަތީޖާއިން، އަބްދުއްރަހީމް މަޖިލީހުގެ ރައީސް ކަމުގެ މަޤާމަށް ގެންނަން ބޭނުން ނުވާ، ޕީއެންސީގެ މެމްބަރުންވެސް އެބަ ތިއްބެވިކަން ދޭހަ ވެއެވެ.