20 ވަނަ ރައްޔިތުންގެ މަޖިލީހުގެ މެމްބަރުން މަޤާމުގެ ހުވާ ކުރައްވައިފިއެވެ.

ރައްޔިތުންގެ މަޖިލީހުގެ 20 ވަނަ ދައުރަށް އިންތިޚާބުވެފައިވާ މެމްބަރުން ހުވާ ކުރުމުގެ ރަސްމިއްޔާތު ބާއްވާފައި ވަނީ މިއަދު ހެނދުނު 9:00ގައި ރައްޔިތުންގެ މަޖިލިސް ކުރާ ގޭގައެވެ. މިރަސްމިއްޔާތުގައި ރައްޔިތުންގެ މަޖިލީހުގެ އައު މެންބަރުންނަށް ހުވައި ލައިދެއްވީ ދިވެހިރާއްޖޭގެ އުއްތަމަ ފަނޑިޔާރު މުއްތަސިމް އަދުނާން އެވެ.

20 ވަނަ ރައްޔިތުންގެ މަޖިލީހަށް 93 ދާއިރާއެއްގައ އިންތިޚާބު ބާއްވައި މެމްބަރުން ހޮވާފައި ވެއެވެ.

ރައްޔިތުންގެ މަޖިލީހުގެ އައު ދައުރު މިއަދު ފެށޭއިރު، ސަރޔކާރު ހިންގާޕާޓީ ޕީއެންސީން ވަނީ، މަޖިލިސް އިންތިޚާބުގައި 66 ގޮނޑި ކާމިޔާބުކޮށްފައެވެ. އަދި އަމިއްލަ ގޮތުން ރައްޔިތުންގެ މަޖިލީހުގެ އިންތިޚާބު ކުރައްވައި، މަޖިލީހަށް ހޮވިވަޑައިގެންނެވި، 9 މެމްބަރަކު ޕީއެންސީއާ ގުޅިވަޑައިގެންނެވުމާއި އެކު، 20 ވަނަ ރައްޔިތުންގެ މަޖިލީހުގެ ދައުރު މިއަދު ފެށޭއިރު އެޕާޓީގައި 75 މެމްބަރުން އެބަތިއްބެވިއެވެ.

މީގެ އިތުރުން ރައްޔިތުންގެ މަޖިލީހުގައި ސަރުކާރާއި އެކު ގުޅިގެން މަސައްކަތް ކުރާނެ ޕާޓީތަކާއި މެމްބަރުންނަށް ބަލާއިރު، މަޖިލީހުގެ 79 މެމްބަރުންގެ ވޯޓު ސަރުކާރަށް ކަށަވަރު ވެއެވެ.