ރާއްޖޭގެ އުތުރުގެ ސަރަހައްދަށް ބިންހެލުމެއް އަތުވެއްޖެއެވެ.

މޫސުމާއި ބެހޭ ޤައުމީ އިދާރާއިން ވިދާޅުވީ، މިރޭ ހދ. އަތޮޅުގެ ބައެއް ރަށްރަށުގެ ބިންގަނޑަށް ލޮޅުމެއް އައި ކަމުގެ ރިޕޯޓް ލިބިފައިވާ ކަމަށެވެ. އަދި އެބިން ހެލުމުގެ ލޮޅުން މިރޭގެ، 08:27 ގައި ހދ. ހަނިމާދޫގައި ބަހައްޓާފައި ހުންނަ ބިން ހެލުން މޮނިޓަރ ކުރާ މީޓަރަށް ރެކޯޑް ކުރެވިފައިވާ ކަމުގައިވެސް މޫސުމާއި ބެހޭ ޤައުމީ އިދާރާއިން ވިދާޅުވިއެވެ. އެހެން ނަމަވެސް އެއިދާރާއިން ވިދާޅުވީ، އެލޮޅުންތަކުގެ ސަބަބުން ރާއްޖެއަށް ނުރައްކަލެއް ނެތް ކަމަށެވެ.

މި ބިންހެލުމާއި ގުޅޭ އެއްވެސް މައުލޫމާތެއް ޔޫއެސްޖިއޮލޮޖިކަލް ސަރވޭއިން ހާމަކޮށްފައެއް ނުވެއެވެ. އެހެން ނަމަވެސް ބައެއް އެހެން މަސްދަރުތަކުން ހާމަކޮށްފައިވާ ގޮތުގައި، ބިންހެލުން އައިސްފައި ވަނީ ހދ.އަތޮޅުގެ ހުޅަނގުން ރާއްޖޭގެ ކަނޑުގެ ސަރަހައްދަށެވެ. އަދިބިންހެލުމުގެ ބާރުމިން ހުރީ ރިކްޓަރ މިންގަނޑުން 4.5 ގައެވެ.