ރައްޔިތުންގެ މަޖިލީހުގެ ރައީސާއި ނައިބު ރައީސް ހޮވުމަށް ބާއްވާ ޖަލްސާގެ ރިޔާސަތު ބަލަހައްޓަވާ މެމްބަރަކަށް، ރައްޔިތުންގެ މަޖިލީހުގެ މީދޫ ދާއިރާގެ މެމްބަރު އަޙްމަދު ސިޔާމް ހަމަޖައްސަވާފައިވާ ކަމުގައި ރައްޔިތުންގެ މަޖިލީހުގެ އިދާރާއިން ވިދާޅުވެއްޖެއެވެ.

ރައްޔިތުންގެ މަޖިލީހުގެ އިދާރާއިން ވިދާޅުވީ، 20 ވަނަ ރައްޔިތުންގެ މަޖިލީހުގެ މެމްބަރުން ހުވާުރެއްވުމާއިއެކު 20 ވަނަ ރައްޔިތުންގެ މަޖިލީހުގެ ފުރަތަމަ ދައުރުގެ ފުރަތަމަ ޖަލްސާ ބޭއްވުމަށް ހަމަޖައްސާފައި ވަނީ މާދަމާ ހެނދުނު 9:00 ގައި ރައްޔިތުންގެ މަޖިލިސް ކުރާ ގޭގައި ކަމަށެވެ. 

ރައްޔިތުންގެ މަޖިލީހުގެ ފުރަތަމަ ޖަލްސާގެ ރިޔާސަތު ބެލެހެއްޓުން މަޖިލީހުގެ އިދާއިން އަޙްމަދު ސިޔާމާއި ހަވާލު ކުރެއްވީ، މަޖިލީހުގެ ޤަވާއިދުގައި އޮންނަ ގޮތުން އެޖަލްސާގެ ރިޔާސަތު ބެލެހެއްޓުމަށް އައްޔަނު ކުރެވޭނީ، މަޖިލީހުގައި މެދު ނުކެނޑި އެންމެ ގިނަ ދުވަހު ހުންނެވި، އަދި އެންމެ އުމުރުން ދޮށީ ބޭފުޅަކާއި ކަމަށްވާތީއެވެ.

ރައްޔިތުންގެ މަޖިލީހުގެ ސުޕަރމެޖޯރިޓީ ސަރުކާރު ހިންގާ ޕީއެންސީއަށް އޮތް އިރު، އެޕާޓީއަށް ރައްޔިތުންގެ މަޖިލީހުގެ 75 ގޮނޑި ވަނީ ލިބިފައެވެ. އަދި އެޕާޓީއަށް ތާއީދު ކުރާ އިތުރު މެމްބަރުންނާއި އެކު ޖުމުލަ 79 ވޯޓު ރައްޔިތުންގެ މަޖިލީހުގައި އެޕާޓީއަށް ކަށަވަރު ކުރެވެއެވެ.

ރައްޔިތުންގެ މަޖިލީހުގެ ރައީސަކަށް، ރައްޔިތުންގެ މަޖިލީހުގެ ފޮނަދޫ ދާއިރާގެ މެމްބަރު އަބްދުއްރަޙީމް ޢަބްދުﷲ ހޮއްވެވުމަށް ރައީސް ޑރ. މުޙައްމަދު މުޢިއްޒު ނިންމަވާފައި ވާއިރު، ރައްޔިތުންގެ މަޖިލީހުގެ ނައިބު ރައީސްގެ މަޤާމަށް ޢައްޔަނުކުރުމަށް ނިންމާފައި ވަނީ، ރައްޔިތުންގެ މަޖިލީހުގެ ދިއްގަރު ދާއިރާގެ މެމްބަރު، އަޙްމަދު ނާޒިމެވެ.