ކ. ގުރައިދޫގެ ޚާއްޞަ އެހީއަށް ބޭނުންވާ މީހުންގެ މަރުކަޒުގައި 'ރީއިންޓަގްރޭޝަން ވޯޑު' ގެ ނަމުގައި މުޅިން އައު ވޯޑެއް ހުޅުވާފައިވާ ކަމުގައި،  އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން ވިދާޅުވެއްޖެއެވެ.

އެވުޒާރާއިން ވިދާޅުވި، އަލަށް ހުޅުވި މިވޯޑަކީ، ފަރުވާ ފުރިހަމަކޮށް ޢާއިލާތަކަށް އަނބުރާ ދިޔުމުގެ ކުރިން އިޖުތިމާޢީ އެކި ހުނަރުތައް އެފަރާތްތަކަށް ދަސްކޮށްދިނުމުގެ ގޮތުން ހުޅުވި ވޯޑެއް ކަމަށެވެ.

މިގޮތުން، އަލަށް ހުޅުވުނު މި ވޯޑު ޚާއްޞަކުރެވިފައި ވަނީ ނަފްސާނީ ބައްޔަށް ފަރުވާ ހޯދަމުންދާ، މުޖުތަމަޢަށް ނިކުތުމަށް ތައްޔާރުވެފައިވާ އަންހެނުންނަށް ކަމުގައިވެސް އެވުޒާރާއިން ވިދާޅުވިއެވެ. މިގޮތުން މި ވޯޑު ހުޅުވުމުގެ އެންމެ ބޮޑު އެއް މަޤުޞަދަކީ ގޭތެރޭގެ ދިރިއުޅުމުގައި ބޭނުންކުރާ ހުނަރު ތަކާއި އާންމު އިޖުތިމާޢީ ހުނަރުތައް ދަސްކޮށްދިނުން ކަމުގައިވެސް އެވުޒާރާއިން ވަނީ ފާހަގަކުރައްވާފައެވެ.

ބަދިގެއާއި އެކު ބޭނުންކުރެވޭ ގެއެއް ގޮތަށް ފަރުމާ ކޮށްފައިވާ 10 މީހުންގެ ޖާގައިގެ މި އިމާރާތުގެ އިތުރުން ފިރިހެނުންނަށް ޚާއްޞަ 14 އެނދުގެ މިފަދަ އެހެން ވޯޑެއް އަންނަ މަހު ހުޅުވުމުގެ ތައްޔާރީތައް މިހާރު ދަނީ ކުރެވެމުން ކަމުގައިވެސް އެވުޒާރާއިން ވިދާޅުވެފައި ވެއެވެ.