އާޓިފިޝަލް އިންޓެލިޖެންސް (އޭއައި) ބޭނުންކޮށްގެން ކިޔަވައި ދިނުމަށް ޓީޗަރުން ތަމްރީން ކުރުމުގެ މަސައްކަތް މިއަހަރު ފައްޓަވާނެ ކަމުގައި މިނިސްޓަރ އޮފް އެޑިޔުލޭޝަން ޑރ. އިސްމާއިލް ޝަފީއު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، މިއަދު ފެށުނު ދިރާސީ އައު އަހަރުގެ މުނާސަބަތުގައި ދިވެހިރާއްޖޭގެ އަޑާއި ޓެލެވިޜަން މޯލްޑިވްސް މެދުވެރިކުރައްވައި ދެއްވި ޚިޠާބުގައެވެ.

މިނިސްޓަރ ގެ ޚިޠާބުގައި ވިދާޅުވީ، ޓެކްނޮލޮޖީގެ ބޮޑު ބަދަލަކަށް ދުނިޔެ މިސްރާބު ޖަހާފައިވާއިރު، ތަރައްޤީގެ މައިދާނުގައި ދިވެހިރާއްޖޭގެ މުސްތަޤުބަލުގެ ޖީލު ބައްޓަން ކުރަންވާނީ ޓެކްނޮލޮޖީއަށް އަހުލުވެރި، ކުރިއެރުމަށް ލޯބިކުރާ، އިސްލާމީ މަތިވެރި އަގުތައް އަށަގެންފައިވާ ބައެއްގެ ގޮތުގައިކަމަށެވެ. އަދި އާޓިފިޝިއަލް އިންޓަލިޖެންސް ފަދަ، ޒަމާނީ ޓެކްނޮލޮޖީ ބޭނުން ކޮށްގެން އުނގެނުމާއި އުނގަންނައިދިނުން ހަރުދަނާ ކުރުމަށް މުދައްރިސުން އަހުލުވެރި ކުރުވުމާއި، ޝާމިލުކޮށްގެން އުނގަންނައިދިނުމުގައި އެސިސްޓިވް ޓެކްނޮލޮޖީ ބޭނުންކޮށްގެން އުނގަންނައި ދިނުމަށް މުދައްރިސުން އަހުލުވެރި ކުރުވުމަށް، މި ދިރާސީ އަހަރުގެ ތެރޭގައި ޚާއްޞަ އިސްކަމެއް ދެއްވާނެ ކަމުގައިވެސް އެމަނިކުފާނު ވިދާޅުވިއެވެ.

އެޑިޔުކޭޝަން މިނިސްޓަރ ވިދާޅުވީ، ޢިލްމީ، ފަންނުވެރި، މަސައްކަތްތެރި ޖީލެއް ބިނާކުރުމަށް މިކުރާ މަސައްކަތް ކާމިޔާބުވާނީ އެންމެން، ވިސްނުންތެރިކަމާއި ޙިކުމަތްތެރިކަމާއެކު، ގުޅިގެން ކުރާ މަސައްކަތުން ކަމަށެވެ. މޮފިތުން ޚާއްޞަކޮށް ސްކޫލުތަކާއި ބެލެނިވެރީންނާއި ދެމެދު އޮންނަ ގުޅުން ވަރުގަދަވެ ހަރުދަނާވާންޖެހޭކަން އެމަނިކުފާނު ފާހަގަކުރެއްވިއެވެ. އެޑިޔުކޭޝަން މިނިސްޓަރ ވަނީ، މި ފެށުނު ދިރާސީ އަހަރަކީއެ  ގުޅުންތައް އިތުރަށް ތަރައްޤީވެ، ދަރިވަރުންގެ ކުރިއެރުމަށް އެންމެންގެ ވިސްނުމާއި ފިކުރު ސީދާވެގެންދާނެ އަހަރެއްކަމުގައި އެމަނިކުފާނު ޔަޤީންކުރައްވާ ކަމުގައިވެސް ވިދާޅުވެފައެވެ.

މީގެ އިތުރުން އެޑިޔުކޭޝަން މިނިސްޓަރ ވިދާޅުވީ، ދިރާސީ އާ އަހަރަކަށް ކުރިމަތިލާއިރު، އެންމެ އިސްކަމެއް ދޭންވީ، އިސްލާމް ދީނަށް ލޯބިކުރާ، މައިންބަފައިންނަށް ކިޔަމަންތެރި، މުދައްރިސުންނަށް ޤަދަރާއި އިޙްތިރާމްކުރާ، ހިންމަތާއެކު އުނގެނުމަށް މަސައްކަތްކުރާ، ޒިންމާދާރު ދަރިވަރަކަށްވުމަށް ކަމަށާއި، އެކަކު އަނެކަކަށް އިޙްތިރާމް ކުރުމާއެކު، ތިމާ އާއި ތިމާ ވަށައިގެންވާ އެންމެންގެ ސަލާމާތާއި ރައްކާތެރިކަމަށް އިސްކަންދޭ ދަރިވަރަކަށް ވުމަށް ކަމަށެވެ. އަދި އުނގެނުމަށް މިލިބިފައިވާ ރަނުގެ ފުރުޞަތު އެންމެ ހެޔޮގޮތުގައި ބޭނުން ކުރުމަށް ހުރިހާ ދަރިވަރުންނަށްވެސް އެމަނިކުފާނު ނަސޭޙަތްތެރިވެވަޑައިގެންނެވިއެވެ.