ރ. އުނގޫފާރުގައި މަގުބައްތި ހޮޅި ދަނޑިއަކުން ކަރަންޓުގައި ޖެހުނު ދެ ކުދިން ސަލާމަތްކުރުމަށް ފެންގަނޑަށް އެރުނު 18 އަހަރުގެ ޒުވާނާއަށް ވެންޓިލޭޓަރުގައި ފަރުވާ ދިނުމަށްފަހު، އިތުރު ފަރުވާއަށް އިއްޔެ މާލެ ގެނަސްފިއެވެ. ނަމަވެސް އޭނާގެ ހާލަތާ ގުޅޭ އިތުރު މައުލޫމާތެއް އަދި މި ނޫހަށް ޔަގީން ކުރެވިފައެއް ނުވެއެވެ.

މި ހާދިސާގައި އަނިޔާވެފައިވަނީ 8 އަހަރުގެ ފިރިހެން ކުއްޖާއާއި 12 އަހަރުގެ އަންހެންކުއްޖެއްގެ އިތުރުން، މި ދެ ކުދިން ސަލާމަތްކުރުމަށް ދިޔަ 18 އަހަރުގެ ފިރިހެން ކުއްޖެކެވެ. މީގެ އިތުރުން މި ހާދިސާއާ ގުޅިގެން އިތުރު ކުޑަ އަންހެން ކުއްޖަކަށްވެސް ފަރުވާ ދީފައިވެއެވެ. އެ ކުޑަ ކުއްޖާއަކީ ހާދިސާގެ މަންޒަރުފެނިގެން ޝޮކް ޖެހުނު ކުއްޖެއް ކަމުގައި އުނގޫފާރު ރީޖަނަލް ހޮސްޕިޓަލުން ވިދާޅުވެފައިވެއެވެ.

ކަރަންޓުގައި ފުރަތަމަ ޖެހުނު ދެ ކުދިން ވަނީ އުނގޫފާރު ހޮސްޕިޓަލުން ފަރުވާ ދިނުމަށްފަހު ގެޔަށް ދޫކޮށްލާފައެވެ.

މި ހާދިސާ ހިނގާފައިވަނީ ކުޑަ ދެ ކުދިން އެރަށުގެ ކުޑަކުދިންގެ ޕާކު ކައިރީ ފެންގަނޑެއްގައި ކުޅެނިކޮށް އެތާހުރި މަގުބައްތިއަކުން ކަރަންޓުގައި ޖެހިގެނެވެ.