ބެޔާ ލެވަކޫސެންގެ މި ތާރީހީ ސީޒަނުގައި ޖަރުމަނު ލީގުގެ އިތުރުން، އެ ކުލަބުން ޖަރުމަނު ކަޕް ވެސް ކާމިޔާބުކޮށްފިއެވެ. އޮލިމްޕިއާސްޓޭޑިއަން ބާލިން ސްޓޭޑިއަމްގައި އެފްސީ ކެއިސާލޫޓާން އާ ބައްދަލުކުރި މެޗު ލެވަކޫސެން އިން ކާމިޔާބުކުރީ 1-0 އިންނެވެ.

ލެވަކޫސެންގެ ގޯލު މެޗުގެ 17 ވަނަ މިނެޓުގައި ކާމިޔާބުކޮށްދިނީ މި ސީޒަނުގައި މޮޅު ކުޅުމެއްދައްކާފައިވާ، އާސެނަލްއިން އެ ޓީމަށް ބަދަލުވި ގްރޭނިޓް ޖަކާއެވެ. މިއީ ޖަރުމަނު ކަޕްގައި އޭނާ ކާމިޔާބުކުރި ފުރަތަމަ ގޯލެވެ. ޕެނަލްޓީ އޭރިޔާގެ ބޭރުން ވާތުފައިން ޖަކާ ފޮނުވާލި ބޯޅަ ގޯލުގެ ތެރެއަށް ވަނީ، އެ ބޯޅަ ހުއްޓުވުމަށް އިދިކޮޅުގެ ކީޕަރަށް އެއްވެސް ފުރުސަތެއް ނުދީއެވެ.

ފައިނަލް މެޗުގައި ގޯލު ޖެހުމަށްފަހު ޖަކާ އުފާފާޅުކުރަނީ

މި މެޗުގެ ލެވަކޫސެންއަށް އެންމެ ބޮޑު ގޮންޖެހުމަކަށްވީ، ފުރަތަމަ ހާފު ނިމެން ކުޑަތަންވެފައި ވަނިކޮށް އެ ޓީމުގެ ޑިފެންޑަރ އޮޑިލޯން ކޮސޯނޯއަށް ދެ ރީދޫ ކާޑާއެކު ރަތް ކާޑެއް ދައްކާ ދަނޑުން ފޮނުވާލުމުންނެވެ. އަދި އޭގެ ފަހުގައި 10 މީހުނާއެކު ކުޅެމުންދިޔަ ލެވަކޫސެންއަށް، ދެވަނަ ޑިވިޝަނުގައި ކުޅެމުންދާ ކެއިސާލޫޓާން އިން ވަނީ އުނދަގޫ ވަގުތުތަކެއް ގެނުވާފައެވެ. ނަމަވެސް ފައިނަލާ ހިސާބަށް ދަތުރުކުރިއިރު މުބާރާތުގައި އެންމެ 5 ގޯލު ވަދެފައިވާ ލެވަކޫސެންގެ ގޯލު އެ ޓީމަށް ފޫއަޅުވާލެވިފައެއް ނުވެއެވެ.

ކެއިސާލޫޓާން ވަނީ މީގެކުރިން 4 ފަހަރު މި މުބާރާތް ކާމިޔާބުކޮށްފައެވެ. އެ ޓީމު ފުރަތަމަ ޑިވިޝަނުން ރެލިގޭޓުވެފައި ވަނީ 2012 ވަނަ އަހަރުއެވެ. އޭގެ ފަހުން އެ ޓީމަށް ފުރަތަމަ ޑިވިޝަނަށް އާދެވިފައެއް ނުވެއެވެ. އަދި މިފަހަރުގެ ފައިނަލު އެ ޓީމަށް ކާމިޔާބު ކުރެވުނުނަމަ އެ ޓީމުވެގެން ދިޔައީހީ 1992 ވަނަ އަހަރަށްފަހު، ފުރަތަމަ ޑިވިޝަނުން އައި ޓީމަކުން ފިޔަވާ އެހެން ޓީމަކަށް މި މުބާރާތް ކާމިޔާބު ކުރެވުނު ފުރަތަމަ ފަހަރަށެވެ.

މި ސީޒަނުގައި ލެވަކޫސެން ބަލިވެފައިވަނީ އެންމެ މެޗަކުންނެވެ. އެއީ ބަލިނުވެ 51 މެޗު ހަމަކުރިފަހުން، ޔޫރޮޕާ ލީގުގެ ފައިނަލުގައި އެޓްލާންޓާގެ އަތުން 3-0 އިންނެވެ.