މިއަދު އިރުއޮއްސުނު ވަގުތު ކައްދޫ އިން މާލެއަށް ދަތުރު ކުރި މޯލްޑިވިއަންގެ ފްލައިޓް Q2-165 މޫސުމް ގޯސްވުމުގެ ސަބަބުން ވެލާނާ އެއާޕޯޓުގައި ނުޖެއްސިގެން އަނބުރާ ގޮސް ކައްދޫ އެއާޕޯޓުގައި ޖައްސައިފިއެވެ.

މިއަދު އިރު އޮއްސުނު ވަގުތު މާލެ ސަރަހައްދަށް ވަރަށް ބޮޑަށް މޫސުމް ގޯސްވެ ވެލާނާ އެއާޕޯޓުގައި ފްލައިޓްތައް ޖައްސަން އުނދަގޫވިއެވެ. މިގޮތުން ބައެއް ޑޮމެސްޓިކް ފްލައިޓްތަކާއި އިންޓަރނޭޝަނަލް ފްލައިޓްތައްވެސް ވެލާނާ އިންޓަރނޭޝަނަލް އެއާޕޯޓުގައި ނުޖެއްސިގެން މަތީގައި މަޑު ކުރަން ޖެހުނެވެ. 

ވެލާނާ އިންޓަރނޭޝަނަލް އެއާޕޯޓުގައި ނުޖެއްސިގެން އަނބުރާ ގޮސް ކައްދޫ އެއާޕޯޓުގައި ޖެއްސުމަށްފަހު، މޯލްޑިވިއަންގެ ފްލައިޓް Q2-165 އަލުން ކައްދޫއިން ފުރީ މިރޭގެ 20:15 ހާއިރުގައެވެ. އެފްލައިޓް ވެލާނާ އިންޓަރނޭޝަނަލް އެއާޕޯޓުގައި ޖައްސާފައި ވަނީ މިރޭގެ 21:10 ގައެވެ.

މިހަފްތާގައި ވަނީ، ވެލާނާ އިންޓަރނޭޝަނަލް އެއާޕޯޓުން، ކައްދޫ އެއާޕޯޓަށް ދަތުރުކުރި މޯލްޑިވިއަންގެ ފްލައިޓެއްވެސް، މޫސުމް ގޯސްވެ ކައްދޫގައި ނުޖެއްސިގެން އަނބުރާ އައިސް ވެލާނާ އިންޓަރނޭޝަނަލް އެއާޕޯޓުގައި ޖައްސާފައެވެ.

މިދުވަސް ވަރު ރާއްޖެއަށް ކުރަމުންދާ ވިއްސާރައިގެ ސަބަބުން ވައިގެ ދަތުރުފަތުރާއި ކަނޑު ދަތުރު ފަތުރަށް ވަނީ ބުރޫ އަރާފައެވެ.