ރ. އުނގޫފާރުގައި މަގުބައްތި ހޮޅި ދަނޑިއަކުން ކަރަންޓުގައި ޖެހުނު ދެ ކުދިން ސަލާމަތްކުރުމަށް ފެންގަނޑަށް އެރުނު 18 އަހަރުގެ ޒުވާނާއަށް ފަރުވާދެމުން އަންނަނީ ވެންޓިލޭޓަރުގައި ކަމަށް "ނޫން" އަށް އެނގިއްޖެއެވެ.

މި ހާދިސާގައި އަނިޔާވެފައިވަނީ 8 އަހަރުގެ ފިރިހެން ކުއްޖާއާއި 12 އަހަރުގެ އަންހެންކުއްޖެއްގެ އިތުރުން، މި ދެ ކުދިން ސަލާމަތްކުރުމަށް ދިޔަ 18 އަހަރުގެ ފިރިހެން ކުއްޖެކެވެ. މީގެ އިތުރުން މި ހާދިސާއާ ގުޅިގެން އިތުރު ކުޑަ އަންހެން ކުއްޖަކަށްވެސް ފަރުވާ ދީފައިވެއެވެ. އެ ކުޑަ ކުއްޖާއަކީ ހާދިސާގެ މަންޒަރުފެނިގެން ޝޮކް ޖެހުނު ކުއްޖެއް ކަމުގައި އުނގޫފާރު ރީޖަނަލް ހޮސްޕިޓަލުން ވިދާޅުވެފައިވެއެވެ.

ކަރަންޓުގައި ފުރަތަމަ ޖެހުނު ދެ ކުދިން ވަނީ ފަރުވާ ދިނުމަށްފަހު މިހާރު ހޮސްޕިޓަލުން ދޫކޮށްލާފައެވެ.

މި ނޫހަށް މައުލޫމާތު ލިބިފައިވާ ގޮތުގައި ވެންޓިލޭޓަރުގައި އޮތް 18 އަހަރުގެ ކުއްޖާ މާލެ ގެންދިއުމަށް ޑޮކްޓަރު އަދި އަންގާފައެއް ނުވެއެވެ.

މި ހާދިސާ ހިނގާފައިވަނީ ކުޑަ ދެ ކުދިން އެ ރަށުގެ ކުޑަކުދިންގެ ޕާކު ކައިރީ ފެންގަނޑެއްގައި ކުޅެނިކޮށް އެތާހުރި މަގުބައްތިއަކުން ކަރަންޓުގައި ޖެހިގެނެވެ.