ރ. އުނގޫފާރުގައި ދެ ކުއްޖަކު ކަރަންޓްގައި ޖެހި އެއްކުއްޖެއްގެ ހާލު ސީރިއަސްވެ ފަރުވާދޭންފަށައިފިއެވެ.

އުނގޫފާރު ރީޖަނަލް ހޮސްޕިޓަލުން ވިދާޅުވީ، ކަރަންޓްގައި ޖެހިގެން ފަރުވާ ދެމުން ދަނީ އުމުރުން 18 އަހަރުގެ ކުއްޖަކަށާއި، އުމުރުން، 8 އަހަރުގެ ފިިރިހެން ކުއްޖެކަށެވެ. މީގެ އިތުރުން ކުޑަ އަންހެންކުއްޖަކަށްވެސް ފަރުވާ ދެމުންދާ ކަމަށާއި އެކުޑަކުއްޖާއަކީ ހާދިސާގެ މަންޒަރުފެނިގެން ޝޮކް ޖެހި ފަރުވާ ދެމުންދާ ކުއްޖެއް ކަމުގައި އުނގޫފާރު ރީޖަނަލް ހޮސްޕިޓަލުން ވިދާޅުވިއެވެ.

މިހާދިސާ ހިނގާފައި ވަނީ ކުޅެން އުޅުނު ކުޑަ ފިރިހެން ކުއްޖާ، އުނގޫފާރު ކުޑަކުދިންގެ ކަންމަތީގައި ޖަހާފައި ހުރި މަގުބައްތިއަކުން މަގުމަތީގައި އޮތް ފެންގަނޑަކަށް ކަރަންޓްއައިސްގެން ކަމުގައި މައުލޫމާތު ލިބިފައިވެއެވެ. ހާލު ސީރިއަސްވި 18 އަހަރުގެ ޒުވާނާއަކީ އެކުޑަކުއްޖާ ސަލާމަތް ކުރަން އުޅުނު ޒުވާނާއެވެ.

އުނގޫފާރު ރީޖަނަލް ހޮސްޕިޓަލުން ވިދާޅުވީ، 18 އަހަރުގެ ޒުވާނާގެ ހާލު ސީރިއަސް ކަމަށާއި އޭނާއަށް މިވަގުތު ފަރުވާ ދެމުންދަނީ، އުނގޫފާރު ރީޖަނަލް ހޮސްޕިޓަލުގެ އައިސީޔޫގައި ކަމަށެވެ.

މިހާދިސާ އުނގޫފާރު ޕޮލިސް ސްޓޭޝަނުން މިހާރު ގެންދަނީ އިތުރަށް ތަޙްޤީޤު ކުރަމުން ކަމުގައި މައުލޫމާތު ލިބިފައިވެއެވެ.