ޤުރުއާނުގެ ޢާޔަތެއް ޝައިޚް އާދަމް ނިޝާނަށް ނުބައިކޮށް ކިޔެވުމުން އެއީ ޝައިޚް ނިޝާނަކީ، ކީރިތިޤުރުއާން ތަހްރީފްކޮށް ބަދަލުކުރާ މީހެއްގެ ގޮތުގައި ތުހުމަތު ކުރަންވީ ކަމެއްތޯ ވިދާޅުވެ ޝައިޚް ޝިފާން ރައްދު ދެއްވައިފިއެވެ.

އެމްޑީޕީގެ ރިޔާސީ ކެމްޕޭނުގެ ތެރެއިން ބޭއްވި ޖަލްސާއެއްގައި، ކީރިތި ރަސޫލާގެ ހަޔާތްޕުޅުން، ޝައިޚް އިމްރާން ދެއްކެވި މިސާލަކީ، ނަބިއްޔާގެ ހަދީޘް ބަސްފުޅެއް ނޫންކަމަށް ވިދާޅުވެ، އަދި ޝައިޚް އިމްރާން ނަބިއްޔާގެ މައްޗަށް ދޮގެއް ހެއްދެވިކަމަށް ވިދާޅުވެ، ޝައިޚް އާދަމް ނިޝާން ވަނީ ވީޑިއޯއެއް އާއްމު ކުރައްވާފައެވެ.

ހަރުކަށި ދީނީ ފިކުރަށް ވާގިވެރިވުމާއި މުޖުތަމަޢުގެ އަމަން ނަގާލުމަށް މަސައްކަތް ކުރުމުގެ ތުހުމަތުތަކާއި ގުޅިގެން މީގެ ކުރިން ޖަލުގައިވެސް ބަންދުކޮށްފައިވާ އާދަމް ނިޝާނަކީ، ސަރުކާރާއި، އަދި ޚާއްސަކޮށް އަދާލަތުޕާޓީގެ ރައީސް އަދި ހޯމް މިނިސްޓަރު އައްޝައިޚް އިމްރާނާއި މެދު ޒާތީގޮތުން ޢަދާވާތްތެރިކަމެއް އޮތްކަމަށް ބަހާއި އަމަލުން ފާހަގަވެފައިވާ ބޭފުޅެކެވެ.

ޝައިޚް އިމްރާން ގެންނެވީ ހަދީސެއް ނޫންކަމަށާއި އެއީ ރަސޫލާގެ މައްޗަށް ހެއްދެވި ދޮގެއްކަމުގައި ވިދާޅުވެ އެންމެ ފުރަތަމަ ސޯޝަލް މީޑިއާގެ މަންސަތަކުގައި އެވާހަކަ ދެއްކެވީވެސް ޝައިޚް އާދަމް ނިޝާނެވެ. ޝައިޚް އާދަމް ނިޝާން ހައްދަވައި އާއްމު ކުރެއްވި ވީޑިއޯގައި، ސޫރަތުލް ތައުބާގެ 3 ވަަނަ އާޔަތް ތިލާވަތު ކުރެއްވި އިރު، އެއާޔަތުގެ އެއްކަލިމަ ޝައިޚް އާދަމް ނިޝާން ތިލާވަތު ކުރެއްވީ ރޯނުބައިކޮށްކަން ފާހަގަކުރައްވައި، ޝައިޚް ޝިފާން ކުރެއްވި ޓްވީޓުގައި ވަނީ، އާޔަތް ނުބައިކޮށް ތިލާވަތު ކުރެވުމުން ޝައިޚް ނިޝާނަކީ މާތް الله ގެ ކަލާމްފުޅު ތަޙްރީފްކޮށް ބަދަލު ކުރާމީހެއް ކަމުގައި ތުހުމަތު ކުރަންވީތޯ ސުވާލު ކުރައްވާފައެވެ.

ޝައިޚް އިމްރާނުގެ މައްޗަށް ތުހުމަތުކޮށް ޝައިޚް އާދަމް ނިޝާން ހެއްދެވި ވީޑިއާގައި، ސޫރަތުލްތައުބާގެ 3 ވަނަ އާޔަތް ތިލާވަތު ކުރެވިފައި ވަނީ ނުބައިކޮށްކަމަށް ފާހަގަކުރުމާއި ގުޅިގެން، އޭނާ ވަނީ އެކުށް އިސްލާޙްކުރައްވައި ޓްވީޓް ކުރައްވާފައެވެ.

ހޯމް މިނިސްޓަރު އިމްރާންގެ މައްޗަށް ޝައިޚް އާދަމް ނިޝާން ކުރެއްވި ތުހުމަތާއި ގުޅިގެން، މިނިސްޓަރ އިމްރާންވެސް ވަނީ ޓްވީޓެއް ކުރައްވާފައެވެ. މިނިސްޓަރ އިމްރާން ވިދާޅުވީ، އެމަނިކުފާނަކީ ކީ ރަސޫލާ صلى الله عليه وسلم ގެ ޙަދީސްފުޅުތަކުގެ ދަރަޖަ ކަނޱައަޅަން އެނގޭވަރުގެ ޢިލްމުވެރިއެއް ނޫން. ޝައިޚް އާދަމް ނިޝާނަކީވެސް އެވަރުގެ ބޮޑު އިލްމުވެރިއެއް ކަމުގައި އެމަނިކުފާނަށް ހީފުޅުނުކުރެއްވޭ ކަމަށެވެ. 

އަދި ދަސްކުރަންޖެހެނީ ބޮޑެތި ޢިލްމުވެރިންގެ ފޮތްތަކާއި ދަރުސްތަކުން ކަމުގައިވެސް މިނިސްޓަރ އިމްރާން ވިދާޅުވިއެވެ. އަދި ޝައިޚް (އާދަމް ނިޝާން)ކުރައްވާ ކުއްތަކާ ހައްދަވާ ގޯސްތަކަށް ރައްދު ދިނުމަކީ ކުރެއްވޭނެ މާ މޮޅުކަމަކާ ހެޔޮ ކަމެއް ކަމަކަށް ދެކި އެކަން ކުރައްވަން ނޫޅުއްވާ ކަމުގައިވެސް ޝައިޚް އިމްރާން ވިދާޅުވިއެވެ.

މިނިސްޓަރ އިމްރާން ރަސޫލާގެ މައްޗަށް ދޮގެއް ހެއްދެވީ ކަމުގައި ވިދާޅުވެ، ޝައިޚް އާދަމް ނިޝާނު ދެއްކެވި ވާހަކަފުޅަށް އެހެން ބައެއް ޢިލްމްވެރިންވެސް ވަނީ ރައްދު ދެއްވައި، އެކަން އިތުރަށް ތަފްޞީލްކޮށްދެއްވާފައެވެ.

ހޯމް މިނިސްޓަރު އިމްރާން ރަސޫލާގެ މައްޗަށް ދޮގެއް ހެއްދެވީ ކަމަށާއި، ޢަރަބި ބަހުން މިނިސްޓަރ އިމްރާން ވިދާޅުވި އިބާރާތްވެސް ވިދާޅުވީ، ނުބައިކޮށްކަމުގައި ވިދާޅުވެ ޝައިޚް އާދަމް ނިޝާން ހެއްދެވި ވީޑިއޯގައި، ޝައިޚް އާދަމް ނިޝާނަށް ޤުރުއާނުގެ އާޔަތެއް ކިޔެވުނީ ނުބައިކޮށެވެ.