މިހަފްތާގެ އާދިއްތަ ދުވަހު، އަވަހާރަވި އީރާންގެ ރައީސް އިބްރާހީމް ރައީސީ އާއި އެމަނިކުފާނުގެ އަރިހުގައި ދަތުރު ކުރެއްވި ބޭފުޅުންގެ ހަށިކޮޅުތައް ރަސްމީ ޢިއްޒަތުގައި ފަސްދާނުލައިފިއެވެ.

މިމަހުގެ 19 ވަނަ ދުވަހު ހިނގި ހެލިކޮޕްޓަރު ވެއްޓުމުގެ ހާދިސާގައި އީރާނުގެ ރައީސް ރައީސީ އާއެކު ސަރުކާރުގެ އިސް ބޭފުޅުންތަކެއް އަވަހާރަވިއެވެ. އޭގެ ތެރޭގައި، އީރާންގެ ފޮރިން މިނިސްޓަރ ހުސައިން އާމިރް ޢަބުދުލްލަހްޔާން އާއި، އީރާނުގެ އީސްޓް އަޒަރް ބައިޖާން ޕްރޮވިންސްްގެ ގަވަރުނަރު މާލިކް ރަޙްމަތީ އާއި ތަބްރީޒް ޕްރޮވިންސްގެ އިމާމް މުޙައްމަދު ޢަލީ އަލްޙާޝިމް ހިމެނިވަޑައިގަންނަވައެވެ.

އިއްޔެ ބޭއްވި ޖަނާޒާގައި، އީރާންގެ އެތައް ލައްކަ ބަޔަކު ބައިވެރިވިއެވެ. އަދި މިޖަނާޒާގައި ބައިވެރިވުމަށްޓަކައި، ދުނިޔޭގެ ޤައުމުތަކުން އިސްވެރިން އީރާނަށް ވަޑައިގެންނެވިއެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޚާއްޞަ މަންދޫބެއްގެ ގޮތުން ރާއްޖެއިން ވަޑައިގެންނެވީ، ލޯކަލް ގަވަމެމްޓް މިނިސްޓަރ، އާދަމް ޝަރީފް ޢުމަރެވެ. މިޖަނަާޒާއަށް ވަޑައިގެންނެވި ބޭފުޅުންގެ ތެރޭގައި، ޙަމާސްގެ އަސްކަރީ ގޮފީގެ އިސްލީޑަރު އިސްމާޢީލް ހަނިއްޔާ އާއި، ތޫނިސްގެ ރައީސާއި، އިންޑިއާގެ ބޮޑުވަޒީރުގެ ނައިބާއި، ތުރުކީގެ ނައިބު ރައީސާއި، ޢިރާޤުގެ ބޮޑުވަޒީރާއި، ޤަޠަރުގެ އަމީރާއި އޮމާނާއި ބަޙްރައިން އަދި ސަޢޫދީގެ ޚާރިޖީ ވަޒީރު ހިމެނިވަޑައިގަންނަވައެވެ.

އާދީއްތަ ދުވަހު ހެލިކޮޕްޓަރު ވެއްޓުމުގެ ހާދިސާ ހިނގާފައި ވަނީ މޫސުމް ގޯސްވެގެން ކަމުގައި ބެލެވިފައި ވިޔަސް، ބައެއް އެހެން ފަރާތްތަކުން އެކަމާއި މެދު ސުވާލު އުފައްދައެވެ. އީރާންގެ އުތުރުގެ ސަރަހައްދުގެ ފަރުބަދަމަތީ ސަރަހައްދަކަށް ހެލިކޮޕްޓަރު ވެއްޓުނީ، މޫސުމް ގޯސްވެފައި ވަނިކޮށް ހެލިކޮޕްޓަރަށް މައްސަލައެއް ދިމާވެ ބިމަށް ތިރިކުރަން އުޅުމުގެ ތެރޭގައެވެ.