ހުޅުމާލެ ހިޔާ ފްލެޓްތައް --
ބޯހިޔާވަހިކަން ދިނުމުގައި މުސްކުޅި މައިން ބަފައިން ބަލަހައްޓާ މީހުންނަށް ޚާއްޞަ އިސްކަމެއް ދެނީ
ސަރުކާރުން އަލަށް ފަށާ ބޯހިޔާވަހިކަމުގެ ސްކީމުތަކުގައި ދޮށީ އުމުރުގެ މީހުންނާއެކު ދިރިއުޅޭ ނުވަތަ އެމީހުން ބަލަހައްޓާ ފަރާތްތަކަށް ޕޮއިންޓު ލިބޭނެ އުސޫލުތައް އެކަށައެޅުއްވުމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ނިންމަވައިފިއެވެ.
އެމަނިކުފާނު މިގޮތަށް ނިންމަވާފައި ވަނީ، އާދީއްތަ ދުވަހު ބޭއްވި ވަޒީރުންގެ މަޖިލީހުގެ ބައްދަލުވުމުގައި، މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓް ހުށަހެޅުއްވި ކަރުދާހުގެ މައްޗަށް ވަޒީރުންގެ މެދުގައި މަޝްވަރާކުރެއްވުމަށްފަހުގައެވެ.
ރައީސުލްޖުމްހޫރިއްޔާގެ އޮފީހުން ހާމަކުރައްވާފައިވާ ގޮތުގައި، ރައީސުލްޖުމްހޫރިއްޔާގެ މި ނިންމެވުމާއި ގުޅިގެން، ދޮށީ އުމުރުގެ މީހުންނާއެކު އާއިލާތަކަށް ދިރިއުޅެވޭނެ މަގުފަހި ކުރުމުގެ ގޮތުން ސަރުކާރުން އަލަށް ފަށާ ބޯހިޔާވަހިކަމުގެ ސްކީމުތަކުގައި ދޮށީ އުމުރުގެ މީހުންނާއެކު ދިރިއުޅޭ ނުވަތަ އެމީހުން ބަލަހައްޓާ ފަރާތްތަކަށް ޕޮއިންޓު ލިބޭނެ އުސޫލުތަކެއް އެކަށައަޅުއްވާނެއެވެ. އަދި ދޮށީ އުމުރުގެ މީހުންނަށް ލިބިދޭންޖެހޭ ހައްގުތައް ރައްކާތެރިކޮށްދިނުމުގެ ގޮތުން، ޤާނޫނާއި ގަވާއިދުތަކަށް ގެންނަންޖެހޭ ބަދަލުތައް ގެންނާނެއެވެ.
ސަރުކާރުގެ ބޯހިޔާވަހި ކަމުގެ ސިޔާސަތުގެ ތެރެއިން މިހާތަނަށް، ދޮށީ އުމުރުގެ މީހުން އޮތީ ވަރަށް ބޮޑަށް ހަވާސާ ކުރެވިފައެވެ. ދަރިން ތިބި އަދަދަށް ބަލައިގެން ޕޮއިންޓް އިތުރުވާގޮތަށް އޮތް ނަމަވެސް، މުސްކުޅި މައިން ބަފައިންނާއި އެނޫންވެސް ޝަރުޢީގޮތުން ބަަލަންޖެހޭ އުމުރުން ދޮށީ މީހުން ބަލާ ފަރާތްތަކަށް އެއްވެސް ޚާއްޞަކަމެއް ދީފައެއް ނޯވެއެވެ. މީގެ އިތުރުން ބޯހިޔާވަހިކަމުގެ ސިޔާސަތުތައް މިހާތަނަށް އެކަށައަޅާފައި އޮތް ގޮތުން އުމުރުން 65 އަހަރުން މަތީގެ ދޮށީ އުމުރުގެ މީހުންނަށް ވަކިން ބޯހިޔާވަހިކަމެއް ލިބޭނެ ގޮތެއްވެސް ނެތި އޮންނަނީ އެމީހުން ވަރަށް ބޮޑަށް ނިކަމެތިވެފައެވެ.
ކުރީ ސަރުކާރުގައި ފަށާފައިވާ ބޯހިޔާވަހިކަމުގެ މަޝްރޫޢުތަކުގެ ތެރެއިން ފްލެޓާއި ގޯތި ލިބުނު ފަރާތްތަކަށް ބޯހިޔާވަހިކަން ދިނުމުގެ މަސައްކަތް ސަރުކާރުން ކުރައްވަމުން ގެންދަވާއިރު، ބޯ ހިޔާވަހިކަމުގެ އައު މަޝްރޫޢުތައް މާލެ އާއި އަތޮޅުތަކުގައި ސަރުކާރުން ހިންގެވުމަށް ސަރުކާރުން ނިންމަވައި ބައެއް މަޝްރޫޢުތައް ވަނީ ފައްޓަވާފައެވެ. މާލެ ސަރަހައްދުގެ ބޯހިޔާވަހިކަމުގެ މައްސަލައަށް ޖުމުލަ ޙައްލެއް ހޯއްދަވައި ދެއްވުމަށް ސަރުކާރުން އިޢުލާނު ކުރައްވާފައިވާ އެންމެ މުޙިއްމު އަދި އެންމެ ބޮޑު ބޯހިޔާވަހިކަމުގެ މަޝްރޫޢަކީ، ރަސްމާލެ މަޝްރޫޢެވެ.