ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު
ނަތަންޔާހޫ އާއި އިޒްރޭލުގެ ޑިފެންސް މިނިސްޓަރު ހައްޔަރު ކުރުމަށް އެދި ހުށައެޅުމުން ރައީސް އެކަމަށް މަރުޙަބާ ވިދާޅުވެއްޖެ
ފަލަސްޠީނުގެ ރައްޔިތުންނާއި ދެކޮޅަށް ޤަޠުލްޢާއްމުތައް ހިންގަމުން ގެންދާ އިޒްރާއީލްގެ ބޮޑުވަޒީރު ބެންޖަމިން ނަތަންޔާހޫ އާއީ ޑިފެންސް މިނިސްޓަރ ޔޯވް ގަލަންޓް ހައްޔަރު ކުރުމުގެ އަމުރަކަށްއެދި އިންޓަރނޭޝަނަލް ކްރިމިނަލްކޯޓު، (އައި.ސީ.ސީ)ގެ ޗީފް ޕްރޮސެކިއުޓަރު ކަރީމް ޚާން ހުށައެޅުއްވި ހުށައެޅުމަށް ރައީސުލްޖުމްހޫރިއްޔާ މަރުޚަބާ ވިދާޅުވެއްޖެއެވެ.
ރައީސުލްޖުމްހޫރިއްޔާ ކުރެއްވި ޓްވީޓުގައި ވިދާޅުވީ، އިޒްރޭލުގެ އިސްވެރިން ހައްޔަރު ކުރުމަށް އިންޓަރނޭޝަނަލް ކްރިމިނަލްކޯޓަށް އެދި ހުށައެޅުމަކީ ފަލަސްޠީނުގެ ރައްޔިތުންގެ ހައްޤުތައް ކަށަވަރުކޮށްދިނުމުގައި މިހާތަނަށް، އެޅުނު އެންމެ މުހިއްމު ފިޔަވަޅު ކަމުގައެވެ. އަދި އެއްވެސް ޤައުމަކީ ބައިނަލްއަޤުވާމީ ޤާނޫނުތަކަށް ބޯ ނުލަބައި ތިބެވޭނެ ޤައުމުތަކެއް ނޫންކަމަށާއި، އިޒްރޭލުން ފަލަސްޠީނުގެ ރައްޔިތުންނާއި ދެކޮޅަށް ހިންގަމުންދާ ޤަޠުލު ޢާއްމުތައް ބަލައި ފިޔަވަޅު އެޅެން ޖެހޭނެ ކަމުގައި އެމަނިކުފާނު ވިދާޅުވިއެވެ.
އިޒްރޭލުގެ ބޮޑުވަޒީރާއި ޑިފެންސް މިނިސްޓަރު ހައްޔަރު ކުރުމުގެ އަމުރަށް އެދި ހުށައެޅި އިރު އެކަަމަށް އެކަށީގެންވާ ހެކިތައް ހޯދިފައި ހުރިކަން ޔަޤީން ކުރައްވާ ކަމުގައިވެސް ރައީސުލްޖުމްހޫރިއްޔާގެ ޕޯސްޓްގައި ވިދާޅުވެފައިވެއެވެ.
އިޒްރޭލުގެ ބޮޑުވަޒީރާއި، ޑިފެންސް މިނިސްޓަރުގެ އިތުރުން، ޙަމާސްގެ ވެރިޔާ އާއި ހަމާސްގެ އަސްކަރީ ގޮފީގެ ވެރިޔާ ހައްޔަރުކުރުމަށް އަމުރަކަށްވެސް ވަނީ އައިސީސީއަށް ހުށައަޅާފައެވެ.
ފާއިިތުވި 75 އަހަރު އިޒްރާއީލުން ވަނީ ފަލަޞްތީނުގެ ރައްޔިތުންނާއި ދެކޮޅަށް ބޮޑެތި ޤަޠުލުޢާއްމުތައް ހިންގާފައެވެ.