ހެލިކޮޕްޓަރު ވެއްޓުމުގެ ހާދިސާގައި އީރާންގެ ރައީސް އިބްރާހީމް ރައީސީ އަވަހާރަވުމާއި އެކު، އީރާންގެ ވަގުތީ ރައީސް ކަމުގެ މަޤާމަށް ނައިބު ރައީސް މުހައްމަދު މުހްބަރް އައްޔަނުކޮށްފިއެވެ.

އީރާންގެ ޤާނޫނުތަކުގައި ވާގޮތުން، ރައީސް އަވަހާރަވެއްޖެނަމަ ނުވަތަ މަސްއޫލިއްޔަތު އަދާކުރުމަށް ވަގުތީ ގޮތެއްގައި ނުވަތަ ދާއިމީ ގޮތެއްގައި ނުކުޅެދިއްޖެ ނަމަ، ނައިބު ރައީސް ، ވަގުތީ ރައީސްގެ ގޮތުގައި ހަމަޖެއްސޭނެއެވެ. އަދި ނައިބު ރައީސް ރައީސް ކަމުގެ މަޤާމާއި ހަވާލުވެވަޑައިގެންނެވުމަށްފަހުގައި ގިނަ ވެެގެން 50 ދުވަހުގެ ތެރޭގައި އިންތިޚާބު ބާއްވައި އައު ރައީސަކު ހޮވަންޖެހޭނެއެވެ.

އީރާންގެ ވަގުތީ ރައީސް ކަމުގެ މަޤާމަށް މިއަދު ޢައްޔަނު ކުރެވުނު، މުޙައްމަދު މުހްބަރު އީރާނުގެ ނައިބު ރައީސް ކަމުގެ މަޤާމާއި ހަވާލުވެވަޑައިގެންނެވީ، 2021 ވަނަ އަހަރުގެ އޮގަސްޓް މަހުގައެވެ. މިހާރު އުމުރުފުޅުން 69 އަހަރުފުޅުގެ، މުހައްމަދު މުހްބަރް އަކީ، އީރާނުގެ ރޫހާނީ ލީޑަރު، އާޔަތުއްﷲ ހާމަނާއީ އާއި ގާތްގުޅުމެއް އޮންނަ ބޭފުޅެކެވެ. އެހެންކަމުން، ރައީސީ އަވަހާރަވުމަކުން އީރާންގެ ސިޔާސަތުތަކަށް މާބޮޑު ބަދަލެއް އަންނާނޭ ކަމަށް ނުބެލެވޭ ކަމުގައި މެދުއިރުމަތީގެ މަޝްރަޙް ދިރާސާކުރައްވާ ފަރާތްތަކުން ވިދާޅުވެއެވެ.