އިޒްރާއީލްގެ ބޮޑުވަޒީރު ބެންޖަމިން ނަތަންޔާހޫ އާއި އަސްކަރިއްޔާގެ އިސްވެރިން އަދި ހަމާސް ޖަމާޢަތުގެ އިސްބައެއް ވެރިން ހައްޔަރުކުރުމަށް އަމުރަކަށް އެދި، އިންޓަރނޭޝަނަލް ކްރިމިނަލް ކޯޓު، (އައި.ސީ.ސީ)އަށް ހުށައަޅައިފިއެވެ.

އެފަރާތްތައް ހައްޔަރު ކުރުމުގެ އަމުރަކަށް އެދި ހުށައަޅާފައި ވަނީ، އައިސީސީގެ ޕްރޮސެކިއުޓަރު ކަރީމް އޭ.އޭ ޚާން ކޭސީއެވެ.

މިހުށައެޅުމުގައި އެދިފައި ވަނީ، އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އާއި، އިޒްރޭލުގެ ޑިފެންސް މިނިސްޓަރ ޔޯއާވް ގަލަންޓް ހައްޔަރުކުރުމުގެ އަމުރެއް ނެރެދިނުމަށެވެ. ހަމައެގޮތަށް، ހަމާސްގެ ލީޑަރު ޔަހްހާ ސިންވާރް އާއި ހަމާސްއިން ކުރާ ހަނގުރާމައިގެ އިސްވެރިއަކަށް ހުރި، މުހައްމަދު ދިއާބު އިބްރާހީމް އަލްމަސްރީ އާއި ހަމާސްގެ އަސްކަރީ ގޮފީގެ ވެރިޔާ އިސްމާޢީލް ހަނިއްޔާ ހިމެނެއެވެ.

އިޒްރާއީލުގެ ބޮޑުވަޒީރާއި ޑިފެންސް މިނިސްޓަރު ހައްޔަރު ކުރުމުގެ އަމުރަށް އެދިހުށައެޅި ހުށައެޅުމުގައި، އެދެ ފަރާތަށް ހަނގުރާމައިގެ ޖަރީމާތަކާއި އިންސާނިއްޔަތާއި ޚިލާފު އަމަލުތައް، ހިންގުމާއި، ހަނގުރާމައިގެ ހަތިޔާރެއްގެ ގޮތުގައި ގާޒާގެ ރައްޔިތުން ބަނޑަށް ޖެއްސުން ފާހަގަކޮށްފައިވެއެވެ.