އީރާންގެ ރައީސާއި ސަރުކާރުގެ އިސް އޮފިޝަލުންތަކެއް ދަތުރު ކުރެއްވި ހެލިކޮޕްޓަރު ވެއްޓުނުތާ 11 ގަޑި އިރު ފާއިތުވެ ދިޔައިރުވެސް ހެލިކޮޕްޓަރު ނުހޯދޭ ކަމަށާއި، ހާދިސާގައި އީރާންގެ ރައީސް އިބްރާހީމް ރައީސީ އަވަހާރަވެއްޖެކަމުގެ ފުރުޞަތު ބޮޑުކަމުގައި ރިޕޯޓްތައް ބުނެފިއެވެ.

އީރާންގެ ރައީސް ދަތުރު ކުރެއްވި ހެލިކޮޕްޓަރު ވެއްޓިފައިވަނީ، އީރާނާއި އަޒަރުބައިޖާންގެ ބޯޑަރު ކައިރީގައިވާ ފަރުބަދަަމަތީގެ ސަރަހައްދަކަށެވެ. އެސަރަހައްދު ބެލުމުގައި ހަރަކާތްތެރިވަމުންދާ ތުރުކީގެ ޑްރޯންއަކަށް ބިންމަތިން ހޫނުގެ އަސަރު ފާހަގަކުރެވޭ ތަނެއް ލޮކޭޓް ކުރެވިފައިވާ ކަމުގައިވެސް ރިޕޯޓްތައް ބުނެފައި ވެއެވެ. 

އީރާންގެ ޤައުމީ ޓީވީން، އާއްމު ޓްރާންސްމިޝަން މެދު ކަނޑާލައި ކީރިތި ޤުރުއާން ބްރޯޑްކާސްޓް ކުރަންފަށާފައި ވާތީ، އީރާންގެ ރައީސް އަވަހާރަވެއްޖެކަމަށް ބެލެވޭ ކަމަށްވެސް ބައެއް ފަރާތްތަކުން ވަނީ ބުނެފައެވެ. 

އީރާންގެ ރައީސް އިބްރާހީމް ރައީސީ އާއެކު އެ ހެލިކޮޕްޓަރުގައި ތިއްބެވި އީރާނު ސަރުކާރުގެ އިސްބޭފުޅުންގެ ތެރޭގައި އީރާންގެ ފޮރިން މިނިސްޓަރ ހުސައިން އާމިރް ޢަބުދުލްލަހްޔާން އާއި، އީރާނުގެ އީސްޓް އަޒަރް ބައިޖާން ޕްރޮވިންސްްގެ ގަވަރުނަރު މާލިކް ރަޙްމަތީ އާއި ތަބްރީޒް ޕްރޮވިންސްގެ އިމާމް މުޙައްމަދު ޢަލީ އަލްޙާޝިމް ހިމެނިވަޑައިގަންނަވައެވެ.

އީރާންގެ ރައީސް ދަތުރު ކުރެއްވި ހެލިކޮޕްޓަރު ފެނިއްޖެ ކަމުގައި މީގެ ކުރިން އީރާންގެ ޤައުމީ ޓީވީން ރިޕޯޓްވެސް ކުރިއެވެ. އެހެން ނަަމަވެސް 8 ގަޑިއިރު ފާއިތުވެ ދިޔަ އިރުވެސް ހެލިކޮޕްޓަރު ނުފެންނަކަމަށާއި، އެއިން ދަތުރު ކުރި މީހުންގެ ހިލަމެއް ނެތްކަަމަށް ރެސްކިއުޓީމްތަކުން ވަނީ ބުނެފައެވެ.

އީރާންގެ ރައީސް ދަތުރު ކުރެއްވި ހެލިކޮޕްޓަރު ވެއްޓުނު ހާދިސާ އާއި ގުޅިގެން ދުނިޔޭގެ ޤައުމުތަކުގެ ލީޑަރުން ގެންދަވަނީ ހިތާމަފާޅު  ކުރައްވަމުންނެވެ.