އީރާންގެ ރައީސާއި ސަރުކާރުގެ އިސް އޮފިޝަލުން ދަތުރު ކުރައްވަނިކޮށް ވެއްޓުނު ހެލިކޮޕްޓަރު  ފެނިއްޖެ ކަމުގައި، އީރާނުގެ ޤައުމީ ޓީވީން ބުނެފިއެވެ.

ހެލިކޮޕްޓަރު ފެނުނު ނަމަވެސް އެއިން ދަތުރުކުރި މީހުންގެ ހާލާއި ގުޅޭ ގޮތުން އިރާނުގެ ރަސްމީ ފަރާތަކުން އެއްޗެއް ނުބުނެއެވެ.

ރައީސީ ދަތުރު ކުރެއްވި ހެލިކޮޕްޓަރު ފެނިއްޖެކަމަށް އީރާނު ޤައުމީ ޓީވީން ރިޕޯޓް ކުރިނަމަވެސް، ރެސްކިއު ޓީމުތަކާއި ހަވާލާދީ ރެޑް ކްރެސެންޓުން ރިޕޯޓުކޮށްފައިވާ ގޮތުގައި އަދި މިހާތަނަށް، އެ ހެލިކޮޕްޓަރު ފެނިފައެއް ނުވެއެވެ.

އީރާންގެ ރައީސް އިބްރާހީމް ރައީސީ އާއެކު އެ ހެލިކޮޕްޓަރުގައި ތިއްބެވި އީރާނު ސަރުކާރުގެ އިސްބޭފުޅުންގެ ތެރޭގައި އީރާންގެ ފޮރިން މިނިސްޓަރ ހުސައިން އާމިރް ޢަބުދުލްލަހްޔާން އާއި، އީރާނުގެ އީސްޓް އަޒަރް ބައިޖާން ޕްރޮވިންސްްގެ ގަވަރުނަރު މާލިކް ރަޙްމަތީ އާއި ތަބްރީޒް ޕްރޮވިންސްގެ އިމާމް މުޙައްމަދު ޢަލީ އަލްޙާޝިމް ހިމެނިވަޑައިގަންނަވައެވެ.

އެކި ފަހަރު މަތިން ހެލިކޮޕްޓަރުގެ ފަސިންޖަރުންގެ ތެރެއިން އެކަކާއި ހެލިކޮޕްޓަރުގެ މުވައްޒަފަކާ މުވާސަލާތީ ގުޅުން ގާއިމުކުރެވިފައިވާ އީރާނުގެ ނައިބު ރައީސް ވިދާޅުވި ކަމުގެ ރިޕޯޓުތައްވެސް ފެތުރެމުން ދިޔަ ނަމަވެސް އެކަން ކަށަވަރެއް ނުކުރެވެއެވެ.

ހެލިކޮޕްޓަރު ވެއްޓުމަށް ފަހު ނުފެނި މިހާތަަނަށް 4 ގަޑި އިރަށް ވުރެ ގިނަ ވަގުތު ހޭދަވެފައި ވެއެވެ.

ރައީސީ ދަތުރު ކުރެއްވި ހެލިކޮޕްޓަރު ހޯދުމުގެ މަސައްކަތުގައި އެހީތެރިވުމަށް އަވައްޓެރި ޤައުމުތަކުން އޮތީ ތައްޔާރަށެވެ. އޭގެ ތެރޭގައި ޢިރާޤާއި އަޒަރުބައިޖާންވެސް ހިމެނެއެވެ.