ގެއްލިގެން ހޯދަމުންދާ، "AAA 37" މުދާ އުފުލާ ދޯނި ހޯދުމަށް އެމްއެންޑީއެފް ކޯސްޓްގާޑުން ކުރިއަށްގެންދާ އޮޕަރޭޝަންގައި މިއަދު ކަނޑާއި ވައިގެމަގުން 6240 ސްކެއަރ ނޯޓިކަލް މޭލު ސަރަހައްދެއް ވަނީ ބަލާފައި ކަމުގައި އެމްއެންޑީއެފުން ވިދާޅުވެއްޖެއެވެ.

ދޯނި ގެއްލުނުތާ 72 ގަޑިއރު ވުމާއި ގާތްވެފައި ވާއިރު، މިހާތަނަށް އެދޯނިވެސް އަދި ދޯނި ދަތުރުކުރި މީހަކުވެސް ފެނިފައެއް ނުވެއެވެ.

އެދޯނި ގެއްލިފައި ވަނީ، މެއި 17ވީ ހުކުރު ދުވަހުގެ ހެނދުނު 06:00 ހާއިރު ކ.ތިލަފުށިން ފުރިފަހުންނެވެ. އެދޯނި ދަތުރުކުރަން އޮތީ، މ. މެދުފުށި އައިލެންޑް ރިޒޯޓަށެވެ.

ދޯނި ގެއްލުނު އިރު އެދޯނީގައި، ބަނގްލަދޭޝް ތިން މީހުންނާ ދިވެއްސަކު ހުއްޓެވެ. ދޯނި ހޯދުމުގެ މަސައްކަތުގައި ހަރަކާތްތެރިވަމުން ދަނީ، ކޯސްޓްގާޑު ޝިޕް ޝަހީދު އަލީ އާއި، މޯލްޑިވިއަންގެ މަތިންދާ ބޯޓެކެވެ. މިދުވަސްވަަރަކީ ރާއްޖޭގެ ސަރަހައްދަށް ވަރަށް މޫސުމް ގޯސްވެފައިވާ ދުވަސްވަރެކެވެ.