އީރާނުގެ ރައީސް އިބްރާހީމް ރައީސީ ދަތުރު ކުރެއްވި ހެލިކޮޕްޓަރު ވެއްޓިއްޖެއެވެ.

އީރާންުގެ އުތުރުގެ ސަރަހައްދުން އަޒަރުބައިޖާން ޕްރޮވިންސް ސަރަހައްދުގައި މިހާދިސާ ހިނގީ މޫސުމް ގޯސްވުމާއި ދުންފިނި ބޯވުމުގެ ސަބަބުންނެވެ. އީރާނުގެ ރައީސް އިންނެވި ހެލިކޮޕްޓަރާއި އެކު އެހެން ހެލިކޮޕްޓަރުތައް ދަތުރު ކުރި އިރު އީރާންގެ ރައީސް އިންނެވި ހެލިކޮޕްޓަރު އަދި ނުފެންނަ ކަމަށް އީރާނުގެ ޚަބަރުތައް ގެނެސްދޭ ބައެއް މަސްދަރުތަކުން ބުނެފައިވެއެވެ.

ހާދިސާ ހިނގި ސަރަހައްދަށް ދަތުރު ކުރި ރެސްކިއު ހެލިކޮޮޕްޓަރުތަކަށްވެސް ލޭންޑް ކުރެވޭ ވަރަށް ވުރެ ގޯސް ކަމަށާއި، ދުންފިނި ބޯކަމުން ދުރުފެންނަ ނިސްބަތް ހުރީ 5 މީޓަރަށް ދަށްވެފައި ކަމުގައިވެސް ރިޕޯޓްތައް ބުނެއެވެ.

ހާދިސާ އާއި ގުޅިގެން އީރާނުގެ ރޫހާނީ ލީޑަރު އާޔަތުއްﷲ ޙުމައިނީ މިހާރު ގެންދަވަނީ، ޤައުމީ ސަލާމަތާއި ބެހޭ ކޮމިޓީގެ ކުއްލި ބައްދަލުވުމެއް ބާއްވަވަމުންނެވެ.

މިހާދިސާގައި އީރާންގެ ރައީސް އަވަހާރަވެފައިވާ ނަމަ، ދެން ރައީސް ކަމުގެ މަޤާމަށް ނައިބު ރައީސް މުޙައްމަދު މޮޚްބަރ އައްޔަނު ކުރެއްވުމަށް ފަހުގައި، ކުރިޔަށް އޮތް 50 ދުވަހުގެ ތެރޭގައި އައު އިންތިޚާބެއް ބާއްވަންޖެހޭނެއެވެ.