މުޖުތަމައުގައި އެހީތެރިކަން ބޭނުންވާ ފަރާތްތަކަށް އެހީތެރިކަން ފޯރުކޮށްދޭން ތިބޭ ޚިދުމަތްތެރިންނަކީ، އޯގާތެރިކަމާއި އަޅާލުމާއި އެކު ރައްޔިތުންނާއި ގުޅިގެން ގާތުން ޚިދުމަތްދޭ ބަޔަކަށް ހެދުމަށްޓަކައި އިޖުތިމާއީ އަދި އާއިލީ ތަރައްޤީއާ ބެހޭ ވުޒާރާގެ މުވައްޒަފުންނަށް ތަމްރީން ދިނުމުގެ ސިލްސިލާ ޕްރޮގްރާމްތަކެއް ފަށައިފިއެވެ.

މިގޮތުން މިސިލްސިލާގެ ދަށުން ކުރިޔަށް ގެންދިޔަ ފުރަތަމަ ތަމްރީން ޕްރޮގްރާމް މި މެއި މަހުގެ 13 އިން 18އަށް ވަނީ ކުރިޔަށް ގެންގޮސްފައެވެ. ފުރަތަމަ ތަމްރީން ޕްރޮގްރާމްގައި ބައިވެރިވެފައި ވަނީ، ޕްރިވެންޝަން ޓީމާއި، ސްޓޭޓް ކެއަރ ޓީމް އަދި ހާލު ކިހިނެއް ޕްރޮގްރާމްގައި ބައިވެރިވެފައިވާ ޓީމެވެ. 

އެ މިނިސްޓްރީން ވިދާޅުވީ، މި ތަމްރީން ޕްރޮގްރާމް ހިންގުމުގެ މައިގަނޑު މަޤުޞަދަކީ، ރައްޔިތުންގެ ހާލު ދެނެގަނެ، ރައްޔިތުންނަށް އެހީތެރިކަން ފޯރުކޮށްދޭ ޚިދުމަތްތެރިންނަކީ، އެޚިދުމަތް ފޯރުކޮށްދޭ ފަރާތްތަކަށް އޯގާތެރިކަމާއި، ކުލުނުވެރިކަމާއި، އެހީތެރިވުމުގެ އެދުން އެންމެ ފުރިހަމަ މާނައިގައި އޮވެ އެކަމަށް ހެޔޮހިތުން ހެޔޮ ބަދަލެއް ގެނައުމަށް މަސައްކަތް ކުރާ ބަޔަކު ކަމުގައި ހެދުމެވެ. އަދި އެމަސައްކަތް ކުރުމުގައި ޚިދުމަތް ފޯރުކޮށްދޭ ފަރާތްތަކާއި މުޢާމަލާތް ކުރުމުގައި ބޭނުން ކުރެވޭނެ އެންމެ ރިވެތި އުސޫލުތަކާއި އާދަތަކަށް އެވުޒާރާގެ ޚިދުމަތްތެރިން އަހުލުވެރިކުރުންވެސް މަޤުޞަދުތަކުގެ ތެރޭގައި ހިމެނޭ ކަމުގައިވެސް، އިޖުތިމާއީ އަދި އާއިލީ ތަރައްޤީއާ ބެހޭ ވުޒާރާއިން ވަނީ ބުނެފައެވެ.

އިޖުތިމާއީ އަދި އާއިލީ ތަރައްޤީއާ ބެހޭ ވުޒާރާއިން ވިދާޅުވީ، އިބަމަ ޓީމުތަކަށްވެސް ތަމްރީން ދިނުމުގެ އިތުރު ޕްރިގްރާމްތަކެއް ކުރިޔަށް ގެންދިޔުމަށް ރާވާފައިވާ ކަމަށެވެ.