ޖަރުމަން ބުންޑަސްލީގާގެ މި ސީޒަނުގެ އެންމެ ފަހު މެޗުތައް ހޮނިހިރު ދުވަހުގެރޭ ކުޅުނުއިރު، މީގެ މަހެއްހާ ދުވަސްކުރިން ލީގު ކަށަވަރުކުރި ބެޔާ ލެވަކޫސެންއިން ފަހު މެޗު ވެސް ކާމިޔާބުކޮށް، މިހާތަނަށް އެއްވެސް މެޗަކުން ބަލިނުވެ ޖަރުމަނު ލީގު ކާމިޔާބުކުރި ހަމައެކަނި ޓީމުގެ ޝަރަފު އެ ޓީމުން ހޯދައިފިއެވެ.

ލެވަކޫސެންގެ ބޭއެރީނާގައި ހޮނިހިރު ދުވަހުގެރޭ އޮގްސްބާގް އާއި ބައްދަލުކުރި މެޗު އެ ޓީމުން ކާމިޔާބުކުރީ 2-1 އިންނެވެ. މި މެޗުގައި ލެވަކޫސެންއަށް ލީޑު ނަގައިދިނީ މެޗުގެ 12 ވަނަ މިނެޓުގައި އެ ޓީމުގެ މޮރޮކޯގެ ފޯވާޑް، އެމީން އަދްލީ ފަހިކޮށްދިން ފުރުސަތަކުން ވިކްޓަރ ބޮނިފޭސްއެވެ.

އަދި އެ ޓީމުން ވަނީ ފުރަތަމަ ހާފު ނިމުމުގެ ކުރިން އެންޑްރިޗްގެ ގޯލަކުން ލީޑު ފުޅާކޮށްފައެވެ. މި ގޯލު ފެނިގެން ގޮސްފައިވަނީ މެޗުގެ 27 ވަނަ މިނެޓުގައެވެ.

އޮގްސްބާގަށް އެ މީހުންގެ ހަމައެކަނި ގޯލު ކާމިޔާބުކުރެވުނީ މެޗުގެ 62 ވަނަ މިނެޓުގައެވެ. މި ގޯލު ކާމިޔާބުކޮށްދިނީ އުމުރުން އެންމެ 18 އަހަރުގެ މާރޓް ކޮމޫރްއެވެ. މި ގޯލާއެކު ކޮމޫރް ވެގެންގޮސްފައި މިވަނީ އޮގްސްބާގުގެ ޖާޒީގައި ގޯލެއް ކާމިޔާބުކޮށްދިން އެންމެ ޒުވާން ކުޅުންތެރިޔާއަށެވެ.

ލެވަކޫސެންގެ މި ތާރީހީ ސީޒަނުގައި އެ ޓީމުން ވަނީ ޖުމްލަ 90 ޕޮއިންޓު ހޯދާފައެވެ. ނަމަވެސް އެންމެ ގިނަ ޕޮއިންޓާއެކު ލީގު ނިންމާލުމުގެ ޝަރަފެއް އެ ޓީމަކަށް ނުލިބުނެވެ. އެ ޓީމަށް މަދުވީ އެންމެ ޕޮއިންޓެކެވެ. ޖަރުމަން ލީގުގެ މި ރެކޯޑު އޮތީ ބެޔާން މިއުނިކްގެ އަތުގައެވެ. އެ ޓީމުންވަނީ 2012/13 ސީޒަނުގައި 91 ޕޮއިންޓު ހޯދާފައެވެ.

މީގެ އިތުރުން ލެވަކޫސެންއަށް ލީގުގައި ގޯލެއް ކާމިޔާބު ކުރެވިފައި ނުވަނީ އެންމެ މެޗެއްގައެވެ. އެއީ މެޗްވީކް 19 ގައި ބޮރޫޝިއާ މޮންޗެންލަބަޗްއާ ކުޅުނު މެޗު 0-0 އިން އެއްވަރުވެފައިވުމާ ގުޅިގެންނެވެ. އެހެންކަމުން، ލީގުގައި 34 މެޗު ކުޅުނުއިރު، އެ ޓީމުން ވަނީ 33 މެޗުގައި އިދިކޮޅުގެ ޑިފެންސްލައިން ފޫއަޅުވާލާފައެވެ.