ކ.ތިލަފުށިން ފުރައިގެން މ.މެދުފުށި އައިލެންޑް ރިޒޯޓަށް ދަތުރުކުރަމުންދިޔަ “ތްރީއޭ-37” ނަމަކަށް ކިޔާ މުދާ އުފުލާ ދޯންޏާއި އެދޯނިން ދަތުރުކުރި މީހުން ހޯދުމުގެ މަސައްކަތަށް ކުރިއެރުމެއް ލިބިފައި ނުވާ ކަމުގައި އެމްއެންޑީއެފުން ވިދާޅުވެއްޖެއެވެ.

އެމްއެންޑިއެފުން ވިދާޅުވީ، މޯލްޑިވިއަންގެ މަތިންދާބޯޓެއް ބޭނުންކޮށްގެން އެމީހުން ހޯދުމަށް ވައިގެ މަގުން މިއަދު މަސައްކަތްކޮށްފައިވާ ކަމަށެވެ. އެހެން ނަމަވެސް މިހާތަނަށް ކުރި މަސައްކަތުން ދޯންޏާއި މީހުން އަދި ފެނިފައި ނުވާކަމަށެވެ. އެދޯންޏާއި މީހުން ހޯދުމުގެ މަސައްކަތުގައި، ކޯސްޓްގާޑް ޝިޕް ޝަހީދު ޢަލީ ހަރަކާތްތެރިވަމުންދާ ކަމުގައިވެސް އެމްއެންޑީއެފުން ވަނީ ބުނެފައެވެ.

ތްރީއޭ ކުންފުނީގެ އެދޯނި ގެއްލުނު އިރު، ދޯނިން 4 މީހުންތިބި ކަމުގައި އެދޯނީގެ ވެރިފަރާތާއި ހަވާލާދީ އެމްއެންޑީއެފުން ވަނީ ބުނެފައެވެ.