ރާއްޖޭގެ ސަރަހައްދަށް ވަދެ ޤަވާއިދާއި ޚިލާފަށް މަސްވެރިކަން ކުރަނިކޮށް، އެމްޑީޕީގެ ސަރުކާރުގައި ރާއްޖޭގެ ކޯސްޓްގާޑުން އަތުލައިގަނެ 4.2 މިލިއަން ރުފިޔާއިން ޖޫރިމަނާކުރި އިންޑިއާގެ މަސްބޯޓުގެ ޖޫރިމަނާ މަޢާފްކޮށް މިސަރުކާރުން ފުރުވާލައިފިއެވެ.

މިކަން ހާމަވީ، އެބޯޓު ހިފަހައްޓައި އެބޯޓު ނިސްބަތްވާ ކުންފުނީގެ އަތުން ޖޫރިމަނާ ފައިސާ ހޯދުމަށް، ފިޝަރީޒް މިނިސްޓްރީން ސިވިލްކޯޓަށް ހުށައަޅާފައި އޮތް މައްސަލަ އެމިނިސްޓްރީން އަނބުރާ ގެންދިޔުމަށް ހުށައެޅުމުން އެމައްސަލަ ސިވިލްކޯޓުން ނިންމި ގޮތް އެކޯޓުން ހާމަކުރުމާއި ގުޅިގެންނެވެ.

"ހޮލީ ސްޕިރިޓް" ނަމަކަށް ކިޔާ އިންޑިއާގެ މަސްބޯޓު، ރާއްޖޭގެ ޚާއްޞަ އިޤުތިޞާދީ ސަރަހައްދުގައި ވަނިކޮށް، ދިވެހިރާއްޖޭގެ ކޯސްޓްގާޑުން އެބޯޓު ހިފެހެއްޓީ 22 އޮކްޓޫބަރ 2023 ގައެވެ. އަދި ޖޫރިމަނާ ފައިސާ ހޯދުމަށް ފިޝަރީޒް މިނިސްޓްރީން ސިވިލްކޯޓަށް މައްސަލަ ހުށައަޅައި ރަޖިސްޓްރީކޮށްފައި ވަނީ، 04 ޖެނުއަރީ 2024 ގައެވެ.

ސިވިލްކޯޓުން އާއްމުކުރި ޤަޟިއްޔާ ނިމުނުގޮތުގެ ރިޕޯޓުގައި ބަޔާންކޮށްފައިވާ ގޮތުގައި، ރާއްޖޭގެ ސަރަހައްދުން ޤަވާއިދާއި ޚިލާފަށް މަސްވެރިކަން ކުރަނިކޮށް ހިފެހެއްޓި އިންޑިއާގެ މަސްބޯޓުކޮށްފައިވާ ޖޫރިމަނާ 10 މާރިޗު 2024 ގައި ރައީސުލްޖުމްހޫރިއްޔާގެ އޮފީހުން ވަނީ މަޢާފްކޮށްފައެވެ. އަދި 17 މާރިޗު 2024ގައި އެބޯޓު ވަނީ ރާއްޖެއިން ފުރުވާލާފައެެވެ. އެހެންވެ ފިޝަރީޒް މިނިސްޓްރީން ހުށައަޅާފައިވާ ދައުވާ ފޯމު ބާޠިލްކުރުމަށް އެމިނިސްޓްރީން އެދި ހުށައެޅުމާއި ގުޅިގެން މައްސަލަ ބާޠިލްކޮށް ސިވިލްކޯރުން މައްސަލަ ނިންމީ 16 މެއި 2024 ގައެވެ.

އިންޑިއާގެ މަސްބޯޓުގެ ޖޫރިމަނާ މަޢާފްކޮށް އެބޯޓު ފުރުވާލި ސަބަބެއް ސަރުކާރުން ހާމަކޮށްފައެއް ނުވެއެވެ.

ރާއްޖޭގެ ސަރަހައްދަށް ޤަވާއިދާއި ޚިލާފަށް ވަދެ މަސްވެރިކަން ކުރަމުންދިޔަ އިންޑިއާގެ މަސްބޯޓު 4.2 މިލިއަން ރުފިޔާއިން މަޢާފްކޮށް އެބޯޓު ފުރުވާލާފައި ވަނީ، ރައްޔިތުންގެ މަޖިލީހުގެ އިންތިޚާބު ގާތް ވެފައި ވަނިކޮށް އަދި އިންޑިއާ ސިފައިން ރާއްޖެއިން ގެންގޮސް އޭގެ ބަދަލުގައި އިންޑިއާ އަސްކަރިއްޔާ އާއި ގުޅުން އޮތް ކުންފުންޏެއްގެ މުވައްޒަފުން މަދަނީންގެ ގޮތުގައި ރާއްޖޭގައި ބޭތިއްބުމުގެ މަޝްވަރާތައް އިންޑިއާ ސަރުކާރާއި ދިވެހި ސަރުކާރާއި ދެމެދު ދެކެވެމުން ދަނިކޮށްކަން ފާހަގަކޮށްލެއެވެ.

މީގެ އިތުރުން ރާއްޖޭގެ ޚާއްޞަ އިޤުތިޞާދީ ސަރަހައްދުގެ ތެރެއަށް އިންޑިއާގެ ކޯސްޓުގާޑުގެ އުޅަނދުތައް ވަދެ ރާއްޖޭގެ މަސްބޯޓުތަކަށް އަރައި ބިރުދެއްކި ހާދިސާތަކަށް ފަހު މި ސަރުކާރުން ވަނީ، އެއީ އޮޅުމަކުން ހިނގި ކަމެއް ކަމުގައި ޤަބޫލުކޮށްފައިވާކަން ހާމަކޮށްފައެވެ.