މިއަދު އިރު އޮއްސުނު ވަގުތު މާލެ ސަރަހައްދަށް ޖެހުނު ކޮޅިގަނޑުގައި ބޯކޮށް ވާރެވެހި މާލޭގެ ބައެއް ސަރަހައްދުގައި ފެންބޮޑުވަމުންދާތީ، ސިފައިން ނުކުމެ ފެންހިންދުމުގެ މަސައްކަތް ފަށައިފިއެވެ.

މާލެ ސަރަހައްދަށް ބޯކޮސް ވާރޭ ވެހުމުގެ ސަބަބުން މާލޭގެ އިތުރުން ހުޅުމާލޭގެ ބައެއް ސަރަހައްދުތަކުގައިވެސް ވަނި ފެންބޮޑުވެފައެވެ. އެމްއެންޑީއެފުން ވިދާޅުވީ، މާލޭގައި އާއްމުކޮށް ފެންބޮޑުވާ ސަރަހައްދުތަކުގައި ޕަންޕް ބަހައްޓައިގެން ފެންހިންދުމުގެ މަސައްކަތް ސިފައިން މިހާރު ފަށާފައިވާ ކަމަށެވެ.  

ހުޅަނގު މޫސުމުގެ ވިއްސާރަ އާއި ގުޅިގެން ކުރިޔަށް އޮތް 5 ދުވަހުވެސް ރާއްޖެއަށް މޫސުމް ގޯސްވާނެ ކަމަށް މޫސުމާއި ބެހޭ ޤައުމީ އިދާރާއިން ވަނީ ލަފާކޮށްފައެވެ. އަދި މިރޭގެ 00:00އަށް މުޅި ރާއްޖެއަށް ވައިޓް އެލާޓް ނެރެފައި ވާއިރު، ވިލާގަނޑުގައި ގަޑިއަކު 45 މޭލާއި، 50 މޭލާއި ދެމެދަށް ވައި ގަދަވާނެ ކަމުގައިވެސް މޫސުމާއި ބެހޭ ޤައުމީ އިދާރާއިން ލަފާކޮށްފައިވެއެވެ.