މުވާޞަލާތުގެ އެންމެ ޒަމާނީ ރަސްމަގަށް ރާއްޖެ ހުޅުވާލައި، ދިވެހީންގެ ހުނަރާއި އުފެއްދުންތަކަށް، ދުނިޔޭގެ މާރުކޭޓުގައި އާމުދަނީ ހޯދޭނެ މަގުފަހިކޮށްދެއްވާނެ ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، މިއަދު ފާހަގަކުރާ، ދުނިޔޭގެ މުވާޞަލާތާއި މައުލޫމާތު ފަތުރާ ފަރާތްތަކުގެ ދުވަހުގެ މުނާޞަބަތުގައި ފޮނުއްވި މެސެޖުގައެވެ. 

މުވާޞަލާތާއި އިންފޮމޭޝަން ޓެކްނޮލޮޖީގެ ދާއިރާއިން، ދިވެހިރާއްޖެއަށް ކުރިއެރުންތައް ހޯދައި ދެއްވުމާއި، އެދާއިރާއިން ދިވެހިންނަށް އާމްދަނީ ލިބޭނޭ މަގުތައް ފަހިކޮށްދެއްވުމަކީ ރައީސް ޑރ. މުޙައްމަދު މުޢިއްޒުގެ މެނިފެސްޓޯގައި ހިމަނުއްވާފައިވާ ކަމެކެވެ.

އެންމެ ފުރަތަމަ ދުނިޔޭގައި މިދުވަސް ފާހަގަކުރަމުން އައީ ދުނިޔޭގެ މުވާޞަލާތުގެ ދުވަހުގެ ގޮތުގައެވެ. މެއި 17 ވަނަ ދުވަހަކީ ދުނިޔޭގެ މައުލޫމާތުފޯރުކޮށްދޭ ފަރާތްތަކުގެ ގެ ދުވަހުގެ ގޮތުގައި ފާހަގަކުރަން ނިންމާފައި ވަނީ އިންޓަރ އދ. އާއްމު މަޖިލީހުން ފާސްކޮށްފައިވާ ޤަރާރާއި ގުޅުވައި، 2005 ވަނަ އަހަރު ތޫނިސްގައި ބޭއްވި މައުލޫމާތު ފަތުރާ ފަރާތްތަކުގެ ބައިނަލް އަޤުވާމީ ކޮންފަރެންސްގައެވެ. އޭގެ ފަހުން، ދުނިޔޭގެ މުވާޞަލާތުގެ ދުވަހާއި، ދުނިޔޭގެ މައުލޫމާތުފޯރުކޮށްދޭ ފަރާތްތަކުގެ ގެ ދުވަސް އެއްދުވަހެއްގެ ގޮތުގައި، ވޯލްޑް ޓެލެކޮމިއުނިކޭޝަން އެންޑް އިންފޮމޭޝަން ސޮސައިޓީ ޑޭގެ ގޮތުގައި ފާހަގަކުރުމަށް ނިންމާފައި ވަނީ، 2006 ވަނަ އަހަރު ތުރުކިޔޭގެ އަންޓަލިޔާގައި ބޭއްވި އިންޓަރނޭޝަނަލް ޓެލެކޮމިއުނިކޭޝަން ޔޫނިއަންގެ ކޮންފަރެންސްގައެވެ.