ބިންވެރިޔާ ސްކީމްގެ ދަށުން ދޫކޮށްފައިވާ ގޯތިތައް އަވަސް މުސްތަގުބަލެއްގައި ހަވާލުކުރުމުގެ އެއްވެސް ނިޔަތެއް ސަރުކާރުގެ ނެތްކަން ހާމަވެގެން ހިނގައްޖެ ކަމުގައި، ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެމްބަރު މީކާއީލް އަޙްމަދު ނަސީމް ވިދާޅުވެއްޖެއެވެ.

މީ ކާއީލް މިހެން ވިދާޅުވީ، އޭނާ ހުށައަޅުއްވައިގެން ރައްޔިތުންގެ މަޖިލީހުން ފާސްކުރެއްވި، ދިވެހިރާއްޖޭގެ ބިމާބެހޭ ޤާނޫނަށް 9 ވަނަ އިޞްލާޙު ގެނައުމުގެ ބިލް ރައީސުލްޖުމްހޫރިއްޔާ ތަސްދީޤު ނުކުރައްވައި އަނބުރާ މަޖިލީހަށް ފޮނުއްވައި ލެއްވުމާއި ގުޅިގެންނެވެ. އެބިލަކީ، ނިމިދިޔަ ސަރުކާރުގައި މާލޭގެ ރައްޔިތުންނަށް ހުޅުމާލެ އިންނާއި ގުޅިފަޅުން އަދި ގިރާވަރުފަޅުން ދޫކޮށްފައިވާ ގޯތިތައް  މަސްދުވަހުގެ ތެރޭ ހަވާލުކުރުން ލާޒިމްކޮށްފައިވާ ބިލެކެވެ. ރައްޔިތުންގެ މަޖިލީހުގެ އިއްތިފާޤުން ބިލް ފާސްކޮށްފައި ވާއިރު، ރައީސުލްޖުމްހޫރިއްޔާ ބިލް ތަސްދީޤު ނުކުރައްވައި އަނބުރާ މަޖިލީހަށް ފޮނުއްވާ ލެއްވި އިރު 19 ވަނަ ރައްޔިތުންގެ މަޖިލީހުގެ ޖަލްސާތައް ވަނީ މި މަހުގެ 13 ވަނަ ދުވަހު ނިންމަވާލައްވާފައެވެ.

ރައީސުލްޖުމްހޫރިއްުޔާ ތަސްދީޤު ނުކުރައްވާ އަނބުރާ ފޮނުވާލެއްވި ބިލެއް އެއްވެސް ބަދަލެއް ނުގެނެސް މަޖިލީހުން ދެވަނަ ފަހަރަށް ކުރިން ހަމަ އޮތް ގޮތަށް މަޖިލީހުން ފާސްކުރައްވައިފިނަމަ، އެ ބިލެއް ޤާނޫނަކަށްވެ ގެޒެޓް ކުރަންޖެހޭނެއެވެ.

އޭޕްރީލް މަހުގެ 29 ވީ ހޯމަ ދުވަހު ރައްޔިތުންގެ މަޖިލީހުން ފާސްކޮށް  ތަސްދީޤު ކުރުމަށް ރައީސުލްޖުމްހޫރިއްޔާއަށް ފޮނުއްވެވި އެބިލް ރައީސް އަނބުރާ މަޖިލީހަށް ފޮނުއްވާ ލެއްވީ، އެމަނިކުފާނަށް ބިލެއް ތަސްދީޤު ނުކޮށް ހިފެހެއްޓޭނެ އެންމެ ދިގު މުއްދަތުކަމުގައިވާ 14 ދުވަށް ހަމަ ކުރެއްވުމަށްފަހު، 19 ރައްޔިތުންގެ މަޖިލީހުގެ އެންމެ ފަހު ދައުރުގެ އެންމެ ފަހު ޖަލްސާވެސް ބޭއްވި ފަހުންނެވެ.

19 ވަނަ ރައްޔިތުންގެ މަޖިލިސް 28 މެއިގައި އުވި އައު މަޖިލިސް ހަމަ އެދުވަހު ހުވާކުރާއިރު، މަޖިލީހުގެ ސުޕަރ މެޖޯރިޓީ އޮތީ ސަރުކާރަށެެވެ.

ދިވެހިރާއްޖޭގެ ބިމާބެހޭ ޤާނޫނަށް ގެނައި އިސްލާޙް ތަސްދީޤު ނުކުރައްވައި އަނބުރާ ފޮނުވާލެއްވި ސަބަބެއް މީޑިއާއަށް ހާމަކުރައްވާފައެއް ނުވެއެވެ.