ކުރީ ސަރުކާރުގައި ބިންވެރިޔާ ސްކީމްގެ ދަށުން ދިން ގޯތިތައް ތިންމަސް ދުވަހުގެ ތެރޭގައި ހަވާލުކުރުން ލާޒިމްކޮށް، ރައްޔިތުންގެ މަޖިލީހުން ފާސްކުރި (ދިވެހިރާއްޖޭގެ ބިމާބެހޭ ޤާނޫނު) އަށް 9 ވަނަ އިޞްލާޙު ގެނައުމުގެ ބިލު ރައިސުލްޖުމްހޫރިއްޔާ, ޑރ. މުޙައްމަދު މުޢިއްޒު ތަސްދީޤު ނުކުރައްވައި އަނބުރާ ފޮނުއްވާލައްވައިފިއެވެ.

19 ވަނަ ރައްޔިތުންގެ މަޖިލީހުގެ އެންމެ ފަހުކޮޅު، މިބިލް ފާސްކުރައްވާފައި ވަނީ، އޭޕްރީލް މަހުގެ 29 ވީ ހޯމަ ދުވަހުގައެވެ. ރައްޔިތުންގެ މަޖިލީހުގެ އެންމެ ފަހު ޖަލްސާ ބާއްވާފައި ވަނީ، މި މެއި މަހުގެ 13 ވަނަ ދުވަހުގައެވެ. އެދުވަހު އެބިލް މަޖިލީހުން ފާސްކުރައްވާފައި ވަނީ، ރައްޔިތުންގެ މަޖިލީހުގެ 35 މެމްބަރުންގެ އިއްތިފާޤުންނެވެ. 

(ދިވެހިރާއްޖޭގެ ބިމާބެހޭ ޤާނޫނު) އަށް 9 ވަނަ އިޞްލާޙު ގެނައުމުގެ ބިލަކީ، ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެމްބަރު މީކާއީލް އަޙްމަދު ނަސީމް ހުށައެޅުއްވި ބިލެކެވެ. އެބިލުގެ މައިގަނޑު މަޤުޞަދަކީ، ސަރުކާރުން ދޫކޮށްފައވާ  ގޯތިތައް އަވަހަށް ރައްޔިތުންނަށް ހަވާލުކުރުން ލާޒިމް ކުރުމެވެ.

ވެރިކަން ބަދަލުވިއިރު ބިންވެރިޔާ ސްކީމުގެ ދަށުން ގޯތިދޭން ކަނޑައެޅި މީހުންގެ ތެރެއިން ގިނަ ބަޔަކަށް އޮތީ ގޯތިތައް ހަވާލު ނުކުރެވިއެވެ. އެއާއެކު މިސަރުކާރުން ގޯތިތައް އަތުލައިފާނެ ކަމުގެ ކަންބޮޑުވުން އާއްމުންގެ ހިތްތަކުގައި އޮވެއެވެ. 

ގޯތިތައް ހަވާލު ކުރުން ލާޒިމްކޮށް ބިމާއި ބެހޭ ޤާނޫނަށް ގެނައިިސްލާޙްތަކަށް ޢަމަލުނުކޮށް ބިލް އަނބުރާ މަޖިލީހަށް ފޮނުއްވާ ލެއްވި އިރު، 13 މެއި އިންފެށިގެން ރައްޔިތުންގެ މަޖިލީހުގެ ޖަލްސާތައް ނުބާއްވާނެކަން ރިޔާސަތުން އިއުލާނުކުރެއްވިއެވެ.

ރައްޔިތުންގެ މަޖިލީހުގެ 19 ވަނަ ދައުރު މެއި 28 ވަނަ ދުވަހު ނިމިގެންދާއިރު އެދުވަހު، 20 ވަނަ ރައްޔިތުންގެ މަޖިލީހުގެ މެމްބަރުން ހުވާ ކުރައްވާނެއެވެ. ބިމާއި ބެހޭ ޤާނޫނަށް އިސްލާޙް ހުށައެޅުއްވި މީކާއިލް އަޙްމަދު ނަސީމް 20 ވަނަ ރައްޔިތުންގެ މަޖިލީހުގައިވެސް އިންނަވާނެއެވެ.