ވޭސްޓް މެނޭޖްމަންޓް ކޯޕަރޭޝަން ލިމިޓެޑް (ވެމްކޯ)ގެ ވޭސްޓް ޓްރާންސްފަ ސްޓޭޝަންތަކަށް ކުނި އުކާލުމަށް ވަންނަ އުޅަނދުތަކުން ނަގާ، ގޭޓް ފީ އަންގާރަ ދުވަހުންފެށިގެން އުވާލާފައިވާ ކަމުގައި އެކުންފުނިން ބުނެފިއެވެ.

ކުނި ހިފައިގެން ވަންނަ އުޅަނދުތަކުން ނަގަމުން އަންނަ ގޭޓް ފީ ނެގުން ހުއްޓާލި އިރު، ފީ ނެގުމަށް އެކުންފުނިން ވަނީ ބައެއް ބަދަލުތައް ގެނެސްފައެވެ. މިގޮތުން، ފުރަމާލެ ސަރަޙައްދުގެ ހުރިހާ ޓްރާންސްފަރ ސްޓޭޝަންތަކެއްގައި ކުނީގެ ބަރުދަން ބެލުމުގެ އިންތިޒާމް (ވެއި ބްރިޖް) ޤާއިމުކުރެވެންދެން، މާލެ ޓްރާންސްފާރ ސްޓޭޝަންގައި ކުނީގެ ބަރުދަނަށް ރިޢާޔަތްކޮށް އަގު ނެގުން ހުއްޓާލުމަށްވެސް ނިންމާފައިވާ ކަމުގައި އެކުންފުނިން ވަނީ ހާމަކޮށްފައެވެ.

އެހެން ނަމަވެސް ވެމްކޯއިން ބުނީ، އާންމު ފަރާތްތަކާއި، ކުދި ވިޔަފާރިތަކާއި، ވިޔަފާރި އުސޫލުން ކުނިއުފުލުމުގެ ޙިދުމަތް ފޯރިކޮށްދޭ ފަރާތްތަކުން ޓްރާންސްފާރ ސްޓޭޝަންތަކަށް ގެންނަ ކުނި ޓަނަކަށް ނަގާ ޓިޕިންގް ފީ އަަކީ، މިހާރު -/500ރ ކަމުގައި ހަމަޖައްސާފައި ވާކަމަށެވެ.

މާލެ ސަރަހައްދުގެ ކުނީގެ މައްސަލަ ހައްލު ކުރުމަށް ސަރުކާރުން އުފެއްދެވި ކުންފުނި، ވޭސްޓް މެނޭޖްމަންޓް ކޯޕަރޭޝަނުން އަންނަނީ މާލެ އާއި އަތޮޅުތަކުގެ އާބާދީ ބޮޑެތި ރަށްރަށުގައިވެސް ކުނި މެނޭޖުކުރުމުގެ މަސައްކަތް ކުރަމުންނެވެ.