މި އަހަރުގެ ޖުލައި މަހުގެ 26 ގައި ފްރާންސްގެ ޕެރިހުގައި ފަށާ، "ދަ 2024 ސަމާ އޮލިމްޕިކްސް" އަށް ރާއްޖޭގެ ޓޭބަލް ޓެނިސް ތަރި ފާތިމަތު ދީމާ އަލީ ކޮލިފައިވެއްޖެއެވެ. ދީމާ އޮލިމްޕިކްސް އިން ޖާގަ ހޯދީ ނޭޕާލުގައި ކުރިއަށްދިޔަ ދެކުނު އޭޝިއާ ސަރަހައްދުގެ ކޮލިފިކޭޝަންގެ ސިންގަލްސް ބައިގެ ޗެމްޕިއަންކަން ހޯދައިގެންނެވެ.

މި ކާމިޔާބާއެކީ ދީމާ ވެގެން ގޮސްފައި މިވަނީ އޮލިމްޕިކްސްއަށް ކޮލިފައިވި ރާއްޖޭގެ ފުރަތަމަ އެތުލީޓަށެވެ. މީގެ ކުރިން ރާއްޖެއަށް މުޅިންވެސް އޮލިމްޕިކްސްއިން ފުރުސަތު ލިބިފައިވަނީ، ކޮލިފައިނުވާ ގައުމުތަކުގެ ތެރެއިން ލިބޭ އިންވިޓޭޝަނަލް ފުރުސަތެއްގެ ތެރެއިންނެވެ. ނަމަވެސް މިފަހަރުގެ އޮލިމްޕިކްސް އިން ދީމާ ޖާގަ ހޯދީ ކޮލިފިކޭޝަން ކުޅުމަށްފަހު، އެ ކޮލިފިކޭޝަން ކާމިޔާބުކޮށްގެންނެވެ.

ނޭޕާލުގައި ކުރިއަށްދިޔަ ދެކުނު އޭޝިއާގެ ކޮލިފިކޭޝަން ބުރުގެ ފައިނަލުގައި ދީމާ ބައްދަލުކޮށްފައިވަނީ ސްރީލަންކާގެ ބަންޑާރާ ބިމަންދީއާއެވެ. އަދި އޭނާ މި މެޗު ކާމިޔާބު ކުރީ 4-1 ސެޓުން ބަންޑާރާ ބަލިކުރުމަށްފަހުއެވެ.

Advertisement

ދެކުނު އޭޝިއާގެ ކޮލިފިކޭޝަންގައި އިންޑިއާ ފިޔަވައި ސަރަހައްދުގެ ހުރިހާ ގައުމަކުން ވަނީ ވާދަކޮށްފައެވެ. އަދި މި ކޮލިފިކޭޝަނުގައި ރާއްޖޭގެ ހަތަރު ކުޅުންތެރިން ބައިވެރިވިއެވެ. އެއީ ދީމާގެ އިތުރުން މިޝްކާ މުޙައްމަދު އިބްރާހީމާއި، މޫސާ މުންސިފް އަޙްމަދު އަދި އަޚްޔަރު އަޙްމަދު ޚާލިދެވެ.