އިޒްރާއީލްގެ ވެރިރަށް ތެލް އަވީވްގެ މެދުތެރޭގައި ހުރި އިޒްރޭލު ސިފައިންގެ އަސްކަރީ މަރުކަޒެއްގެ ގުދަންތަކުގައި ރޯވެއްޖެއެވެ.

މީޑިއާތަކުން ރިޕޯޓްކޮށްފައިވާ ގޮތުގައި ރޯވެފައި ވަނީ، ތެލްއަވީވްގައި ހުރި އިޒްރޭލް ސިފައިންގެ ތެލް ހަޝްމޯރް އަސްކަރީ މަރުކަޒުގައެވެ. އެތަނުގައި އަލިފާން ރޯވި ސަބަބެއް އެނގިފައެއް ނުވެއެވެ. އަސްކަރީ މަރުކަޒުގެ ގުދަންތަކުގައި ރޯވެ ބާރުގަދަ ގޮވުންތައް ގޮވަމުންދާކަމަށާއި، އެސަރަހައްދުގެ މަގުތައް މުޅިން ބަންދުކޮށްފައިވާ ކަމަށް މައުލޫމާތު ލިބެއެވެ.

އަލިފާނުގެ ހާދިސާ ހިނގި އަސްކަރީ މަރުކަޒަކީ، އިޒްރޭލު ސިފައިން ވަރަށް ވަރުގަދައަށް ސެކިއުރިޓީ ބަލަހައްޓަމުން އައި މަރުކަޒެކެވެ. އެމަރުކަޒުގައި ރޯވެ އަނދަމުންދާކަމަށް އިޒްރޭލުގެ ބައެއް މީޑިއާތަކުންވެސް ވަނީ ރިޕޯޓްކޮށްފައެވެ.

ރިޕޯޓްތައް ބުނާ ގޮތުގައި 2019 ވަނަ އަހަރުގެ މެއި މަހުގެ 18 ވަނަ ދުވަހުވެސް ހަމަ އެ އަސްކަރީ މަރުކަޒުގައި އަލިފާނުގެ ބޮޑު ހާދިސާއެއް ހިނގާފައިވެއެވެ.