މޯލްޑިވުސް ޕޯޓްސް ލިމިޓެޑް ރީބްރޭންޑްކޮށް އެކުންފުނީގެ ކުލަޔާއި ލޯގޯ ބަދަލުކޮށްފިއެވެ.

މިއީ މޯލްޑިވްސް ޕޯޓްސްގެ 36 އަހަރުގެ ދިގުތާރީޚުގައި ކުންފުނި ރީބްރޭންޑްކޮށް މިފަދަ ބޮޑު ބަދަލެއް ގެނައި ފުރަތަމަ ފަހަރެވެ. އެމްޕީއެލް ރީ ބްރޭންޑްކޮށް ކުލަޔާ ލޯގޯ އިފްތިތާޙްކޮށްފައި ވަނީ ރޭ ހެންވޭރު ދަނޑުގައި ބޭއްވި ޚާއްޞަ ރަސްމިއްޔާތުގައެވެ.

މިރަސްމިއްޔާތުގައި އެމްޕީއެލްގެ ސީއީއޯ ޝާހިދު ޢަލީ ވިދާޅުވީ، ކުންފުނި ރީބްރޭންޑްކޮށް ލޯގޯއާ ކުލަޔަށް ގެނެވުނު ބަދަލަކީ، ކުންފުނީގެ ޚިދުމަތްތައް ޒަމާނީކުރުމަށް ކުރެވެމުން އަންނަ މަސައްކަތްތަކުގެ ތެރޭގައި ހިމެނިގެން ގެނެވުނު ބަދަލެއްކަން އޭނާ ފާހަގަކުރައްވިއެވެ. 

Advertisement

އަދި ޒަމާނީ ކޯޕަރޭޓް މާޙައުލެއްގައި، ޕޯޓްގެ ޚިދުމަތް ފުޅާކުރުމުގެ ޕްލޭންތަކާއިއެކު މަސައްކަތް ކުރާއިރު ކުންފުނީގެ ބްރޭންޑް އިމޭޖްވެސް ޒަމާނީ ވާންޖެހޭކަމުގައި ޝާހިދު ވިދާޅުވިއެވެ. މީގެ އިތުރުން ކުންފުނީގެ ތަރައްޤީއަށް ގިނަ މަސައްކަތްތަކެއް ކުރެވި ކުރިއެރުންތައް ހޯދިފައިވާކަންވެސް ޝާހިދު ވަނީ ފާހަގަކުރައްވާފައެވެ.

މޯލްޑިވްސް ޕޯޓްސް އޮތޯރިޓީގެ ގޮތުގައި، 1987 ވަނަ އަހަރު އުފެދުނު އިދާރާ، ކުންފުންޏަކަށް ބަދަލުކުރައްވާފައި ވަނީ 2008 ވަނަ އަހަރުގައެވެ.