މިއަހަރުގެ މިނިވަން ދުވަސް ވަރަށް ކުލަ ގަދަކޮށް ފާހަގަކުރުމަށް ތައްޔާރުވަމުން އަންނަ ކަމުގައި މިނިސްޓްރީ އޮފް ހޯމް އެފެއާޒުން ހާމަކުރައްވައިފިއެވެ.

ދިވެހިރާއްޖޭގެ މިނިވަން ދުވަހުގެ ގޮތުގައި ފާހަގަކުރަމުން އަންނަނީ ކޮންމެ އަހަރެއްގެވެސް ޖުލައި މަހުގެ 26 ވަނަ ދުވަހެވެ. މިދުވަސް މިނިވަން ދުވަހުގެ ގޮތުގައި ފާހަގަކުރަމުން އަންނަނީ، ދިވެހިރާއްޖެ އިނގިރޭސީންގެ ޙިމާޔަތުގެ ދަށުން ނެއްޓި މިނިވަން މުސްތަޤިއްލު ޤައުމެއްގެ ގޮތުގައި ކަނޑައެޅިގެން ދިޔަ ތާރީޚީ މުނާޞަބަތާއި ގުޅުގައިގެންނެވެ.

2020 ވަނަ އަހަރު ކުރިމަތިވި ކޯވިޑް-19ގެ އާލަމީ ވަބާ އާއި ކުރިމަތިވި އިޤުތިޞާދީ ދަތިތަކާއި ގުޅިގެން ފާއިތުވި އަހަރުތަކުގައި މިނިވަން ދުވަހުގެ ހަރަކާތްތައް ބާއްވާފައި ވަނީ ކުޑަކޮށެވެ.

މިނިސްޓްރީ އޮފް ހޯމްއެފެއާޒްއިން ހާމަކުރައްވާފައިވާ ގޮތުގައި މިއަހަރުގެ މިނިވަން ދުވަހުގެ ހަރަކާތްތައް ކުރިޔަށް ގެންދިޔުމަށް ރާވާފައި ވަނީ، "މިނިވަން އުފާ - މުޅިރާއްޖެއިން" މިޝިޢާރުގެ ދަށުންނެވެ. މިގޮތުން މިނިވަން ދުވަސް ފާހަގަކުރުމުގެ ގޮތުން މާލެއާ އަތޮޅުތަކުގައި ގިނަ ހަރަކާތްތަކެއް ކުރިޔަށް ގެންދިޔުމަށް ވަނީ ރާއްވަވާފައެވެ. މިގޮތުން ރައީސުލްޖުމްހޫރިއްޔާގެ ދެކަނބަލުން ބާއްވަވާ ބައްދަލުކޮށްލެއްވުމާއި، މިނިވަން ދުވަހުގެ ދިދަ ނެގުމާއި، މިނިވަން ދުވަހުގެ ރަސްމީ ޖަލްސާ އާއި، މިނިވަންދުވަހުގެ ޚާއްސަ ކާނިވަލާއި، ފުޅަނދުބުރާއި، އަސްކަރީ ހެވިކަން ދައްކާލުމާއި ޝަރަފްގެ ހިނގާލުން ބޭއްވުމަށް ވަނީ ނިންމަވާފައެވެ. މީގެ އިތުރުން ސްކޫލުތަކުގެ ދަރިވަރުންނަށް ޚާއްސަކޮށްގެންވެސް ހަރަކާތްތައް ދަނީ ހިންގަމުންނެވެ.

ހޯމްއެފެއާޒުން ހާމަކުރައްވާގޮތުގައި އަތޮޅުތަކުގައިވެސް މިނިވަންދުވަހުގެ ހަރަކާތްތައް ކުރިޔަށް ގެންދަވާނެއެވެ.