މޯލްޑިވްސް އިންލަންޑް ރެވެނިއު އޮތޯރިޓީ، (މީރާ)ގެ ކޮމިޝަނަރ ޖެނެރަލް އޮފް ޓެކްސޭޝަންގެ މަޤާމަށް، ޙަސަން ޒަރީރު ޢައްޔަނު ކުރެއްވުމަށް ރައްޔިތުންގެ މަޖިލީހުން މިއަދު ރުުހުން ދީފިއެވެ.

މިއަދު އޮތް 19 ވަނަ ރައްޔިތުންގެ މަޖިލީހުގެ އެންމެ ފަހު ޖަލްސާގައި ވަނީ، ކޮމިޝަނަރ ޖެނެރަލް ޓެކްސޭޝަންގެ މަޤާމަށް ޢައްޔަނުކުރެއްވުމަށް ރައީސުލްޖުމްހޫރިއްޔާ ފޮނުއްވާފައިވާ ނަންފުޅުތަކަށް ރުހުން ދިނުމަށް ވޯޓު ނަގާފައެވެ.

އެ ވޯޓުގައި ބައިވެރިވެ ވަޑައިގެންނެވި މަޖިލީހުގެ މެމްބަރުންގެ ތެރެއިން 45 މެމްބަރުން ވޯޓު ދެއްވާފައި ވަނީ، ޒަރީރު އެމަޤާމަށް ޢައްޔަނުކުރެއްވުމަށް ރުހުން ދިނުމަށް ފެންނަ ކަމަށެވެ. ޒަރީރަސް ރުހުން ދެއްވި އިރު، އޭނާ މިވަގުތު ހުންނެވީ، ބޭންކް އޮފް މޯލްޑިވްސް ގެ ޑިރެކްޓަރުންގެ ބޯޑުގައެވެ. އަދި އެބޯޑުގެ ޗެއަރމަންގެ މަޤާމަށް އޭނާ ޢައްޔަނުކުރައްވާފައި ވަނީ 26 މާރިޗު 2024 ގައެވެ. 

ކޮމިޝަނަރ ޖެނެރަލް ޓެކްސޭޝަންގެ މަޤާމަށް ޒަރީރު ޢައްޔަނުކުރެއްވުމަށް، ރައްޔިތުންގެ މަޖިލީހުން ރުހުންދެއްވާފައިވީ ނަމަވެސް އޭނާއަށް މަޤާމާއި ހަވާލުވެވަޑައިގަންނަވާއިރު، ބީއެމްއެލްގެ ބޯޑުން އިސްތިއުފާ ދެއްވަން ޖެހިވަޑައިގަންނަވާނެއެވެ. ކޮމިޝަނަރ ޖެނެރަލް ޓެކްސޭޝަންގެ މަޤާމު ހުސްވީ، ރައްޔިތުންގެ މަޖިލީހުގެ ތިމަރަފުށީ ދާއިރާއަށް އެމްޑީޕީގެ ޓިކެޓްގައި ވާދަކުރެއްވުމަށްޓަކައި، އެމަޤާމުގައި ކުރިން ހުންނެވި ފަތުހުއްﷲ ޖަމީލު މަޤާމުން އިސްތިއުފާ ދެއްވުމުންނެވެ.

ޒަރީރަށް ރައްޔިތުންގެ މަޖިލީހުން ރުހުން ދެއްވި އިރު، އެމަޤާމަށް ރުހުން ހޯދުމަށް ރައީސުލްޖުމްހޫރިއްޔާ ފޮނުއްވި ނަންފުޅުތަކުގެ ތެރެއިން އިސްކަން ދެއްވާފައި ވަނީ، ކުރިން އެމަޤާމު ފުރުއްވި ޔަޒީދު މުޙައްމަދަށެވެ. 

ކޮމިޝަނަރ ޖެނެރަލް ޓެކްސޭޝަންގެ މަޤާމަށް ޒަރީރު ޢައްޔަނުކުރެއްވުމަށް، ރައްޔިތުންގެ މަޖިލީހުން މިއަދު ރުހުން ދެއްވި އިރު، ޒަރީރު ވަނީ މީގެ ކުރިން، ޑެޕިއުޓީ ކޮމިޝަނަރ ޖެނެރަލް ޓެކްސޭޝަންގެ މަޤާމުވެސް ފުރުއްވާފައެވެ.