ކުޑަކުދިން ކުރާ ޖިނާޢީ ކުށްތަކުގެ ޒިންމާ އެކުދިން އުފުލަންޖެހޭނީ 15 އަހަރު ފުރިފައިވާނަމަ ކަމުގައި މިހާެރު ޤާނޫނުގައި ބަޔާންކޮށްފައި އޮތް އޮތުން 12 އަހަރަށް ދަށްކުރުމުގެ މަސައްކަތްތައް މިހާރު ފަށާފައިވާ ކަމުގައި، މިނިސްޓަރ އޮފް ހޯމް ލޭންޑް ސެކިއުރިޓީ އެންޑް ޓެކްނޯލޮޖީ ޢަލީ އިހްސާން ވިދާޅުވެއްޖެއެވެ.

މިއަދު ބޭއްވި ނޫސްވެރިންގެ ބައްދަލުވުމުގައި މިނިސްޓަރ އިޙްސާން ވިދާޅުވީ، ކުޑަކުދިންގެ ޢަދުލުގެ ޤާނޫނަށް ގެންނަށް އެ އިސްލާޙްގެ ބޭނުމަކީ، އެއްވެސް ޙާލެއްގައި ކުޑަކުދިން ޖަލަށްލައިގެން ގެންގުޅުމެއް ނޫންކަމަށާއި، އޭގެ ބޭނުމަކީ 12 އަހަރުންފެށިގެން، ކުށުގެ ވެށިން ފެންނަ ކުދިން، އަދި ކުށުގެ ވެއްޓަށް ހުށައެޅިދާނެ ކަމަށް ފެންނަ ކުދިން، އަދި ދޭތެރެ ދޭތެރެއިން ކުށުގެވެށިން ހައްޔަރު ކުރެވި ނުވަތަ ފުލުހުންގެ ބެލުމުގެ ދަށަށް ގެނެވޭ ކުދިން، ކުށުގެ ވެށިން ސަލާމަތްކޮށް ރިހެބިލިޓޭޓް ކުރުން ކަމަށެވެ. އަދި މީގެ ކުރިން 15 އަހަރުގެ ކުޑަކުދިންގެ މައްޗަށް ޖިނާޢީ ދައުވާތައްވެސް އުފުލިފައި ހުރިކަން މިނިސްޓަރ ފާހަގަކުރެއްވިއެވެ.

ހޯމް މިނިސްޓަރ ޢަލީ އިޙްސާން ވިދާޅުވީ، މި ޕްރޮގްރާމްގެ ތެރެއިން އެކުދިންނަށް ދީނީ ތަޢުލީމާއި ރަސްމީ ތަޢުލީމުގެ އިތުރުން، ކޮންޓެކްޓް ސްޕޯޓްސް އަދި އޭގެ އިތުރުން ސައިކޯ ސޯޝަލް އިންޓަވޭޝަން ޕްރޮގްރާމްތައް ވެސް ހިންގޭނެ ކަމަށެވެ. މީގެ އިތުރުން މަސައްކަތްތެރިކަމާއި ފަންނުވެރިކަމުގެ ޕްރޮގްރާމްތައް އެކުދިންނަށް ހިންގޭނެ ކަމުގައިވެސް މިނިސްޓަރ ޢަލީ އިޙްސާން ވިދާޅުވިއެވެ. އަދި އޭގެ ނަތީޖާއަކަށް ވެގެންދާނީ ކުށުގެ މާހައުލުގައި މިވަގުތު އުޅެމުންދާ ކުދިންނަށް، ރަނގަޅު މާހައުލެއް ލިބި އެކުދިންގެ ޙަޔާތަށް އައު އުއްމީދެއް ލިބިގެން ދިޔުންކަމުގައިވެސް މިނިސްޓަރ ފާހަގަކުރެއްވިއެވެ.

ހޯމް މިނިސްޓަރ ވިދާޅުވީ، ކުށުގެ ވެށީގައި އުޅޭ ކުޑަކުދިން ރިހެބިލިޓޭޓް ކުރުމަށް ކަނޑައަޅާ އެރަށަށް "ހޯޕް އައިލެންޑްގެ ނަމުން ނަންދިނުމަށް ނިންމާފައިވާ ކަމަށެވެ. އަދި އެރަށުގައި އެކުދިން 18 އަހަރު ފުރެންދެން ގެންގުޅުމަށް ފަހުގައި، ދިވެހި ފުލުހުންގެ ޚިދުމަތަށް ނުވަތަ ދިވެހި ސިފައިންގެ ޚިދުމަތަށް ރަސްމީކޮށް ނެގޭނެ ކަމަށާއި، އަދި ވަކި މުއްދަތަކަށް ފުލުހުންނާއި ސިފައިންގެ ތެރޭގައި ޚިދުމަތްކުރުމަށްފަހުގައި ހަދާ އިވެލުއޭޝަންތަަކަށް ފަހުގައި އެކުދިން ބޭނުންވާ ދާއިރާތަކަކުން ކުރިޔަށް ދިޔުމަށް ފުރުޞަތު ދެވޭނެ ކަމުގައިވެސް މިނިސްޓަރ ވިދާޅުވިއެވެ.

ރާއްޖޭގައި ކުށުގެ ވެށީގައި އުޅޭ ކުޑަކުދިން ރިހެބިލިޓޭޓްކޮށް އަނބުރާ މުޖުތަމަޢަށް ގެނައުމަށްޓަކައި، މީގެ ކުރިން، ކ. ގުރައިދޫގައި ތަޢުލީމާއި މަސައްކަތް އުނގަންނައިދޭ ޤައުމީ މަރުކަޒުގެ ނަމުގައި މަރުކަޒެއް ހިންގާފައިވެއެވެ.