އެމްޑީޕީގެ ވެރިކަން ވެއްޓުނީ ބަޣާވާތަކުން ކަމުގައި ޤަބޫލު ކުރާނެ ޖާގައެއް ނެތްކަމުގައި، އެމްޑީޕީގެ ކުރީގެ ޗެއާ ޕަރަސަން އަދި ރައްޔިތުންގެ މަޖިލީހުގެ ނައިބު ރައީސްކަންވެސް ކުރެއްވި މޫސާ މަނިކު ވިދާޅުވެއްޖެއެވެ،

މޫސަ މިހެން ވިދާޅުވީ، އެމްޑީޕީގެ ރިޔާސީ ކެމްޕޭން، "އުފާވެރި އަމާންރާއްޖެ" ޝިއާރުގެ ދަށުން ރޭ ކ. މާފުށީގައި ބޭއްވި ޖަލްސާގައި ވާހަކަފުޅު ދައްކަވަމުންނެވެ.

އެމްޑީޕީގެ ކުރީގެ ރައީސް އަދި ކުރީގެ ރައީސް މުހައްމަދު ނަޝީދަށް ފާޑުވިދާޅުވެ މޫސަ ވިދާޅުވީ، 2012 ވަނަ އަހަރު އެމްޑީޕީގެ ވެރިކަން ވެއްޓިގެން ދިޔަ ގޮތް މިހާރު ސާފުވާ ކަމަށެވެ. އަދި އޭރު އެއީ ބަޣާވާތެކޭ ހީވިޔަސް މިހާރު މަންޒަރު ބަދަލުވެއްޖެ ކަމުގައި މޫސަ ވިދާޅުވިއެވެ.

2012 ވަނަ އަހަރު އެމްޑީޕީގެ ވެރިކަން ނިމުމަކަށް އައީ 23 ޑިސެމްބަރު 2011އިން ފެށިގެން އޭރުގެ އިދިކޮޅު ފަރާތްތަކުން އެމްޑީޕީ ސަރުކާރާއި ދެކޮލަށް ކުރަމުން ދިޔަ މުޒާހަރާތަކުގެ ތެރެއިންް އުފެދެމުން ދިޔަ ހަމަނުޖެހުންތަކާއި އެކު ރައީސް ނަޝީދުގެ ސަރުކާރަށް އެޅުއްވެމުންދިޔަ ގޯސް ފިޔަވަޅުތަކުގެ ސަބަބުން ކަމުގައި ބައެއް ފަރާތްތަކުން ފާހަގަކޮށްފައި ވެއެވެ. މިގޮތުން ޤާނޫނީ އިމުން ބޭރުން ރައީސް ނަޝީދުގެ ސަރުކާރުން ކުރި ކަންކަމުގެ ތެރޭގައި، ކްރިމިނަލްކޯޓުގެ އޭރުގެ އިސް ޤާޟީ ޢަބުދުﷲ މުހައްމަދު، ޤާނޫނީ ތަރަހައިން ބޭރުން ހައްޔަރުކޮށްގެން ގެންގޮސް އާރަށުގައި ބެހެއްޓުމާއި، ސްޕްރީމްކޯޓުގެ ތަޅުއެޅުވުމާއި، ޤާނޫނާއި ޚިލާފު އަމުރުތައް ސަލާމަތީ ޚިދުމަތްތަކުގެ މައްޗަށް ނެރެމުން ދިޔުން ހިމެނުނެވެ.

ރައީސް ނަޝީދުގެ ވެރިކަން ނިމުމަކަށް އައީ، 2012 ވަނަ އަހަރުގެ ފެބުރުުއަރީ މަހުގެ 7 ވަނަ ދުވަހު، ފުލުހުންނާއި ސިފައިންނާއި ދެމެދު ކުރިމަތިލުންތައް ހިނގުމަށްފަހުގައި، ދިވެހި ސިފައިންގެ ޗެއިން އޮފް ކޮމާންޑް ގެއްލި ސިފައިންވެސް އިހްތިޖާޖު ކުރަމުން ދިޔަ ފުލުހުންގެ ސަފުތަކާއި ގުޅުމުންނެވެ. ސަލާމަތީ ޚިދުމަތްތަކުން ރައީސް ނަޝީދުގެ ސަރުކާރަށް އެއްބާރުލުން ނުދޭނެކަން ހާމަކުރުމަށްފަހުގައި ރައީސް ނަޝީދު، ރައީސުލްޖުމްހޫރިއްޔާ ކަމުގެ މަޤާމުން އިސްތިއުފާ ދެއްވީ، 2012 ވަނަ އަހަރުގެ ފެބުރުއަރީ މަހުގެ މެންދުރުފަހު 1:30 ހާއިރުގައެވެ.

އިސްތިއުފާ ދެއްވުމަށްފަހުގައި، ރައީސް ނަޝީދު ވަނީ ވެރިކަން ބަދަލުވީ ބަޣާވާތަކުން ކަމުގައި ވިދާޅުވެ، ފެބުރުއަރީ 8 ވަނަ ދުވަހު އެމްޑީޕީގެ ސަޕޯޓަރުންނާއި އެކު މަގުމައްޗަށް ނުކުންނަވާފައެވެ. އެދުވަހު ރައީސް ނަޝީދުގެ އަރިހުގައި ހުންނެވި ރީކޯ މޫސާމަނިކަށް ފުރާނައަށް ނުރައްކާވާ ދަރަޖައަށް ޖިސްމާނީ އަނިޔާތައް ލިބި އޭޑިކޭ ހޮސްޕިޓަލްގައި އެޑްމިޓްކޮށް ފަރުވާދޭން ޖެހުނެވެ.

ރައީސް ނަޝީދުގެ ވެރިކަން ބަދަލުވިގޮތް ތަޙްޤީޤުކުރުމަށް ކޮމަން ވެލްތުގެ އެހީއާއެކު އުފެއްދެވި، ކޮމިޝަން އޮފް ނޭޝަނަލް އިންކުއަރީ (ކޯނީ)ގެ ފައިނަލް ރިޕޯޓުގައި ބުނެފައި ވަނީ، ރައީސް ނަޝީދުގެ ވެރިކަން ބަދަލުވެގެން ދިޔައީ ބަޣާވާތަކުން ކަމުގައި ބެލެވެން ނެތްކަމަށެވެ. އެހެން ނަމަވެސް ވެރިކަން ބަދަލުވާން މެދުވެރި ޙާލަތްތަކުގެ ތެރޭގައި ބައެއް ފަރާތްތަކުން ޤާނޫނާއި ޚިލާފަށް ކަންކަންކޮށްފައި ހުރިކަން ކޯނީގެ ރިޕޯޓުގައި ފާހަގަކޮށްފައިވެއެވެ.