ރިޔާސީ އިންތިޚާބުގެ ކެމްޕޭންގެ ތެރޭގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަޢުދުވެވަޑައިގެންނެވި ގޮތަށް އިންޑިއާ ސިފައިން ރާއްޖެއިން ބޭލުމުގެ ވަޢުދު ފުއްދިއްޖެކަމުގައި ސަރުކާރުން ބުނެފިއެވެ.

ރައީސުލްޖުމްހޫރިއްޔާގެ އޮފީހުގައި މިއަދު ބޭއްވެވި ނޫސްވެރިންގެ ބައްދަލުވުމުގައި ފޮރިން މިނިސްޓަރ މޫސާ ޒަމީރު ވިދާޅުވީ، ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ވަޢުދުވެވަޑައިގެންނެވި ގޮތަށް، އިންޑިއާ ސިފައިން ރާއްޖެއިން ބޭލުމުގެ ކަންކަން މިހާރުވަނީ ފުރިހަމަ ކުރެވިފައި ކަމަށެވެ. މިގޮތުން ރާއްޖޭގައި ތިބި އިންޑިއާގެ ހުރިހާ ސިފައިން މިހާރު ވަނީ އެޤައުމުން އަނބުރާ ގެންގޮސްފައިވާ ކަމަށާއި، ރާއްޖޭގައި ތިބި އިންޑިއާ ސިފައިންގެ އެންމެ ފަހު ގުރޫޕް ރާއްޖެއިން ގޮސްފައި ވަނީ މެއި 9 ގައި ކަމުގައި މިނިސްޓަރ ޒަމީރު ވިދާޅުވިއެވެ.

ރާއްޖެއިން އިންޑިއާ ސިފައިން ފޭބި ގޮތް:

7 މާރިޗުގައި 12 ސިފައިން

9 މާރިޗުގައި 14 ސިފައިން

7 އޭޕްރީލްގައި 13 ސިފައިން

9 އޭޕްރީލްގައި 12 ސިފައިން

7 މެއިގައި 12 ސިފައިން

9 މެއިގައި 13 ސިފައިން

ފޮރިން މިނިސްޓަރ މޫސާ ޒަމީރު ވިދާޅުވީ، ރާއްޖޭގައި ތިބީ އިންޑިއާ ސިފައިންގެ 76 މީހުން ކަމަށާއި، އެމީހުންގެ ބަދަލުގައި ހަމަ އެއަދަދަށް އިންޑިއާގެ އާއްމު މީހުން ރާއްޖެ އައިސްފައިވާ ކަމަށެވެ. އަދި އެމީހުންވެސް ޤާއިމްވެ ތިބޭނީ އިންޑިއާ ސިފައިން ޤާއިމްވެ ތިބި މަޤާމުތަކުގައި ކަމުގައި މިނިސްޓަރ ވިދާޅުވިއެވެ. އަދި ރާއްޖޭގައި ތިބި އިންޑިއާ ސިފައިންގެ ތެރެއިން އެންމެފަހުން ރާއްޖެ ދޫކޮށް ގޮސްފައި ވަނީ، ހދ. ހަނިމާދޫގައި ތިބި އިންޑިއާ ސިފައިން ކަމުގައިވެސް މިިނިސްޓަރ ވަނީ ވިދާޅުވެފައެވެ.