ދިވެހިރާއްޖޭގެ ކުޑަކުދިންގެ ދުވަސް ފާހަގަކުރުމުގެ ގޮތުން، އެޗްޑީސީ އާއި އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާގުޅިގެން ކުރިޔަށް ގެންދާ، "އުފާ ފެސްޓިވަލް" މިއަދޔު ހަވީރު ފަށައިފިއެވެ.

ސެންޓްރަލް ޕާކުގައި ކުރިޔަށް ގެންދާ މިފެސްޓިިވަލް ފައްޓަވައި ދެއްވީ، އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާގެ ވަޒީރު، ޑރ. އާއިޝަތު ޝިހާމް އާއި، ހައުސިންގް ޑިވެލޮޕްމަންޓް ކޯޕަރޭޝަންގެ މެނޭޖިންގ ޑައިރެކްޓަރ އިބްރާހީމް ފަޟުލް ރަޝީދެވެ.

ޤައުމީ  ކުޑަކުދިންގެ  ދުވަސް  ފާހަގަކުރުމުގެ މަޤްސަދަކީ  މުޖުތަމަޢުގެ ކުޑަކުދިންގެ  ޙައްޤުތަކާއި  އެކުދިންގެ ކަރާމާތް  ހިމާޔަތްކުރުމުގެ އިތުރުން އެކުދިންގެ އުފާވެރި އަދި ދުޅަހެޔޮކަމަކީ މުޖުތަމަޢުއެއްގައި  އެންމެހާ ފަރުދުންގެ  މަސްޢޫލިއްޔަތެއްކަން  ހަނދާންކުރުން ކަމުގައި، އާއިލާ އާއި ބެހޭ މިނިސްޓްރީން ވިދާޅުވެފައި ވެއެވެ.

އާއިލާ އާއި ބެހޭ ވުޒާރާއިން ހާމަކުރައްވާފައިވާ ގޮތުގައި، އުފާ ފެސްޓިވަލް ކުރިއަށްދާނީ މިއަދާއި މާދަމާ، ހަވީރު 16:00 އިން 18:00 އަށް، އަދި ރޭގަނޑު 20:00 އިން 22:00 އަށެވެ.

މި ފެސްޓިވަލުގައި މާދަމާ، ސްޓޯލްތަކުގެ ހަރަކާތައް ކުރިއަށް  ނުގެންދާނެ ކަމަށާއި، އޭގެ ބަދަލުގައި އޮންނާނީ ފެންކުޅުމުގެ ތަފާތު ހަރަކާތްތައް ކަމުގައި އެވުޒާރާއިން ވިދާޅުވެއެވެ. މިގޮތުން ފޯމް ބައުންސިންގް އިންފްލޭޓެބަލްއާއި، ބައުންސިންގެ ކާސަލްގެ އިތުރުން، ފެން ޖެހުމުގެ ކުޅިވަރު އޮންނާނެކަމަށާއި، މި ހަރަކާތުގައި ބައިވެރިވާން ބޭނުން ހުރިހާ ކުދިންވެސް އަމިއްލަ ފެންބަޑިއެއް ގެންދިއުމަށް އެވުޒާރާއިން ވަނީ އިލްތިމާސްކޮށްފައެވެ.

މީގެ އިތުރުން، މިފެސްޓިވަލްގައި މާދަމާ ރޭގައި ވަރަށް ޚާއްސަ މޫވީ ނައިޓެއްވެސް 20:00އިން 22:00 އަށް ބޭއްވުމަށް ވަނީ ރޭވިފައި ކަމަށާއި، އަދި މޫވީ ނައިޓަށްފަހު، މި ޚާއްސަ ފެސްޓިވަލް ނިންމާލުމުގެ ގޮތުން ހަވާއެރުވުން އޮންނާނެ ކަމުގައިވެސް އާއިލާ އާއި ބެހޭ ވުޒާރާއިން ހާމަކޮށްފައިވެއެވެ.