ހުޅުމާލެއިން ބިންގަތުމަށް ދިވެހިންނަށް ފުރުޞަތު ހުޅުވާލައިފިއެވެ.

އެޗްޑީސީން މިއަދު ކުރި އިޢުލާނުގައި ބުނެފައި ވަނީ، ދިރިއުޅުމަށް ހުޅުމާލެ ބީޗް ފްރަންޓްއިން 13 ބިމެއް ވިއްކުމަށް ނިންމާފައިވާ ކަމަށެވެ. އަދި ބިން ވިއްކުމަށް ހަމަޖައްސާފައި ވަނީ ޕޯޓަލް މެދުވެރިކޮށް ކަމުގައިވެސް އެޗްޑީސީން ވަނީ ބުނެފައެވެ. 

ބިންގަތުމަށް ބޭނުންވާ ފަރާތްތަކުގެ ކިބައިގައި ހުރުން ލާޒިމްކޮށްފައި ވަނީ މައިގަނޑު ދެ ޝަރުޠެކެވެ. އެއީ ވަކި ފަރުދަކު ނަމަ އުމުރުން 18 އަހަރު ފުރިފައި ވުމާއި، ކުންފުންޏެއް ނަމަ %100 ދިވެހިންގެ ޙިއްޞާ އޮންނަ ކުންފުންޏެއް ކަމުގައި ވުމެވެ.

އެޗްޑީސީން ބުނެފައި ވަނީ، ވިއްކުމަށް ހަމަޖެހިފައިވާ ބިންތަކަކީ، 1864 އަކަފޫޓާއި 2408 އަކަފޫޓާއި ދެމެދުގެ 13 ބިން ކަމަށެވެ. މިގޮތުން ބީޗު ފްރޮންޓް އިން ވިއްކާ ބިންތަކުގެ ބީލަން ފެށޭ އަގަކީ، 4500ރ އެވެ. އަދި ބީޗް ސައިޑުން ވިއްކާ ބިންތަކުގެ ބީލަން ފެށޭ އަގަކީ، 4000ރ އެވެ. 

ބިޑް ސެކިއުރިޓީގެ ގޮތުގައި 500،000ރ ހުށައަޅަން ޖެހެއެވެ. ބީލަން ފެށޭ އެންމެ ކުޑައަގުން ބަލާނަމަ އެންމެ ކުޑަ ބިމަށްވެސް 8 މިލިއަން ރުފިޔާ ޖެހެއެވެ.

ބިން ވިއްކުމަށް ހުޅުވާލާފައި ވަނީ ހިޔާ ޓަވަރުތަކުގެ އިރުމަތީ ފަރާތު އަތިރިމަތިންނެވެ.