މާދަމާ ފާހަގަ ކުރާ ދިވެހިރާއްޖޭގެ ޤައުމީ ކުޑަކުދިންގެ ދުވަހުގެ މުނާޞަބަތުގައި ހުޅުމާލޭ ސެންޓްރަލް ޕާކުގައި، “އުފާ ފެސްޓިވަލް”ގެ ނަމުގައި ކުޑަކުދިންނަށް ޚާއްޞަކޮށްގެން ފެސްޓިވަލެއް ބޭއްވުމަށް ނިންމާފައިވާ ކަމުގައި، މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމެންޓްއިން ވިދާޅުވެއްޖެއެވެ. 

އެމިނިސްޓްރީން ވިދާޅުވީ، ޤައުމީ ކުޑަކުދިންގެ ދުވަހުގެ މުނާޞަބަތުގައި ބާއްވާ މި ފެސްޓިވަލް ބޭއްވުމަށް ހަމަޖައްސާފައި ވަނީ މެއި މަހުގެ 10 އަދި 11 ވަނަ ދުވަހުގައި ކަމަށެެވެ. މިގޮތުން އުފާ ފެސްޓިވަލް ބާއްވާނީ ކޮންމެ ދުވަހެއްގެވެސް ހަވީރު 16:00 އިން 18:00އަށް އަދި 20:00 އިން 22:00އަށް ކަމުގައި، އެމިނިސްޓްރީން ވިދާޅުވެއެވެ.

އެޗްޑީސީ އާއި ގުޅިގެން ކުރިޔަށް ގެންދާ އުފާ ފެސްޓިވަލަކީ، ކުޑަކުދިންގެ ދުވަހާއި، ހުޅުމާލެ އާބާދުވިތާ 20 އަހަރު ފުރުން ފާހަގަކުރުމާއި ގުޅުވައިގެން ކުރިޔަށްގެންދާ ހަރަކާތެއް ކަމުގައި އެޗްޑީސީން ވަނީ ބުނެފައެވެ.

ފެސްޓިވަލް ހުޅުވުމުގެ ރަސްމިއްޔާތު ކޭކު ފެޅުމުގެ ހަރަކާތެއް ބާއްވާއިރު، މިސް ޔޫލީ އާއެކު ކުޑަކުދިންގެ ވާހަކަ ކިޔުމުގެ ހަރަކާތަކާއި، ރޮބޯ މޭންގެ ހަރަކާތްތައް އަދި ބޮޑު ބެރު ހަރަކާތްތައް މާއްދަމާ ބާއްވާނެ އެވެ. އަދި ހޮނިހިރު ދުވަހު ފެންކުޅުމާއި، އެދުވަހުގެ ރޭ މޫވީ ނައިޓް އަދި ހަވާއެރުވުން އޮންނާނެ ކަމުގައިވެސް އެޗްޑީސީން ހާމަކޮށްފައިވެއެވެ.

ދިވެހިރާއްޖޭގައި ޤައުމީ ފެންވަރުގައި ފާހަގަ ކުރާ ކުޑަކުދިންގެ ދުވަހަކީ ކޮންމެ އަހަރެއްގެވެސް މެއި މަހުގެ 10 ވަނަ ދުވަހެވެ.