ޔޫއެފާ ޗެމްޕިއަންސް ލީގުގެ ފައިނަލުގެ ފުރަތަމަ ޖާގަ ޖަރުމަނުގެ ބޮރޫޝިއާ ޑޯޓުމަންޑުން ހޯދައިފިއެވެ. ފައިނަލުގެ މި ޖާގަ އެ ޓީމުން ކަށަވަރުކުރީ، ސެމީ ފައިނަލުގެ ދެވަނަ ލެގުގައި 1-0 އިން ފްރާންސްގެ ޗެމްޕިއަން، ޕެރިސް-ސެއިންޓް ޖާމެއިން (ޕީއެސްޖީ) ބަލިކުރުމަށްފަހުއެވެ.

މި ނަތީޖާއާއެކު، ފްރާންސްގެ ޒުވާން ތަރި، ކީލިއަން އެމްބައްޕޭ އަދި ޕީއެސްޖީއިން ފުރަތަމަ ފަހަރަށް އެ ކުލަބުގެ ތާރީހުގައި މި މުބާރާތް ކާމިޔާބުކުރުމަށް ދެކެމުން އަންނަ ހުވަފެން އަނެއްކާ ވެސް ބޭކާރުވެފައިވާއިރު، މި ސީޒަންގެ ސެމީ ފައިނަލާ ހިސާބުން އެ ޓީމު ކަޓުވާލުމަށް، ޑޯޓުމަންޑުގެ ކެޕްޓަން މެޓްސް ހުމެލްސް ވަނީ ބޮޑު ދައުރެއް އަދާކޮށްފައެވެ.

ޖަރުމަނުގައި ކުޅުނު ފުރަތަމަ ލެގު ޑޯޓުމަންޑުން 1-0 އިން ކާމިޔާބުކުރި މެޗުގެ މޮޅު ކުޅުންތެރިޔާގެ މަގާމު ހޯދާ، އަންގާރަ ދުވަހުގެރޭ ފްރާންސްގައި ކުޅުނު ދެވަނަ ލެގުން ޕީއެސްޖީ ބަލިކުރި ގޯލު ކާމިޔާބުކޮށްފައިވަނީ ވެސް ހުމެލްސްއެވެ. ހުމެލްސްއަކީ މި މުބާރާތުގައި ޑޯޓުމަންޑަށް ދެވަނައަށް އެންމެ ގިނައިން މެޗު ކުޅެދީފައިވާ ކުޅުންތެރިޔާ ވެސް މެއެވެ.

ޑޯޓުމަންޑުގެ ގޯލަކީ އެ ޓީމަށް ލިބުނު ކޯނަރަކުން، މެޗުގެ 50 ވަނަ މިނެޓުގައި ހުމެލްސް ބޮލުން ކާމިޔާބުކުރި ގޯލެކެވެ.

މެޗުގެ ދެވަނަ ހާފުގައި ޕީއެސްޖީއިން ވަނީ ގޯލެއް ކާމިޔާބުކުރުމަށް ނުރައްކާތެރި ހަމަލާތަކެއް އުފައްދާފައެވެ. ނަމަވެސް  އެ ޓީމުން ކުރަމުން ދިޔަ މަސައްކަތަށް ހުރަސްއެޅީ ގޯލުގެ ހުރަސް ދަނޑިއެވެ.

1996/67 ސީޒަނުގައި މި މުބާރާތް ކާމިޔާބުކުރި ފަހުން، ޑޯޓުމަންޑު މުބާރާތުގެ ފައިނަލަށް ދަތުރުކޮށްފައިވަނީ 2012/13 ސީޒަނުގައެވެ. ބެޔާން މިއުނިމާ ދެކޮޅަށް ކުޅުނު އެ ފައިނަލު އެ ޓީމަށް ގެއްލުނީ، މެޗު ނިމެން މިނެޓަކަށް ވެފައިވަނިކޮށް އާޔެން ރޮބެން ކާމިޔާބުކުރި ގޯލަކުން، 2-1 ގެ ނަތީޖާއަކުން ބަލިވެގެނެވެ. އަދި މި ފަހަރުގެ ފައިނަލުގައި ވެސް ބެޔާން މިއުނިކާ ޑޯޓުމަންޑު ފެނުމަކީ އެކަށީގެންވާ ކަމެކެވެ. 

ޕީއެސްޖީއިން ވަނީ މިދިޔަ ހަފްތާގައި ކުލަބުގެ ތާރީހުގައި 12 ވަނަ ފަހަރަށް ލީގު-1 ކާމިޔާބުކޮށްފައެވެ. ނަމަވެސް ޑޯޓުމަންޑު އޮތީ ޖަރުމަން ބުންޑަސްލީގާގެ ފަސްވަނައިގައެވެ.

ދެވަނަ ސެމީފައިނަލުގެ ދެވަނަ ލެގުގައި ބުދަ ދުވަހުގެރޭ ރިއާލް މެޑްރިޑާއި ބެޔާން މިއުނިކް ނިކުންނައިރު، މިއުނިކްގައި މި ދެ ޓީމު ބައްދަލުކުރި ފުރަތަމަ ލެގުގެ ނަތީޖާ ވަނީ 2-2 އިން ހަމަހަމަވެފައެވެ.