ރާއްޖޭގައި ތިބި އިންޑިއާ ސިފައިންގެ ތެރެއިން މިހާތަނަށް 51 މީހަކު ވަނީ އަނބުރާ އިންޑިއާއިން އެޤައުމަށް ގެންގޮސްފައި ކަމުގައި، ރައީސުލްޖުމްހޫރިއްޔާގެ އޮފީހުގެ ޗީފް ސްޕޯކްސް ޕަރސަން ހީނާ ވަލީދު ވިދާޅުވެއްޖެއެވެ.

ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި، ހީނާ ވިދާޅުވީ، މިހާތަނަށް ރާއްޖެއިން ގެންގޮސްފައި ވަނީ، ދެ ޕްލެޓްފޯމެއްގައި ތިބި 51 ސިފައިން ކަމަށާއި، މެއި މަހުގެ 10 ވަނަ ދުވަހުގެ ކުރިން ރާއްޖޭގައި ތިބި ހުރިހާ ސިފައިން އިންޑިއާއިން އަނބުރާ ގެންދާނެ ކަމަށެވެ. އަދި އެމީހުންގެ ބަދަލުގައި، ރާއްޖެއަށް އައި އިންޑިއާގެ މަދަނީންގެ އަދަދު އެތާރީޚަށްފަހުގައި ހާމަކުރައްވާނެ ކަމަށް ހީނާ ވިދާޅުވިއެވެ.

މީގެ އިތުރުން ހީނާ ވަނީ، ފޮރިން މިނިސްޓަރ މޫސާ ޒަމީރު މިމަހުގެ ތެރޭގައި އިންޑިއާއަށް ރަސްމީ ދަތުރުފުޅެއް ކުރައްވާނެ ކަމުގައިވެސް ވިދާޅުވެފައެވެ.

Advertisement

އިންޑިއާ ސިފައިން ރާއްޖެއިން އަނބުރާ ފޮނުވާލުމަށް ސަރުކާރުން ނިންމާފައިވާ ނިންމުން ތަންފީޒުކޮށް ނިންމުމަށް ބާކީ އޮތީ 4 ދުވަހެވެ. ރާއްޖޭގައި ތިިބި އިންޑިއާގެ ހުރިހާ ސިފައިން މިހަފްތާގެ ހުކުރު ދުވަހުގެ ކުރިން އަނބުރާ ޤައުމަށް ގެންދިޔުމަށް، އިންޑިއާއިން ވަނީ އެއްބަސްވެފައެވެ.