ރިޔާސީ ދެވަނަ ދައުރުގެ އަމާޒަކީ، ޒުވާނުންނަށް އިތުރު ފުރުޞަތުތައް ފަހިކޮށްދީ، ރައްޔިތުންނަށް އުފާވެރި ދިރިއުޅުމެއް ހޯދައި ދިނުމާއި، އިޤުތިޞާދު ދެގުނަ ކުރުން ކަމުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، އުފާވެރި އަމާން ރާއްޖެ ކެމްޕޭންގެ ތެރެއިން މިރޭ ކ. މާފުށީގައި ބޭއްވި ޖަލްސާގައި ދެއްކެވި ވާހަކަފުޅުގައެވެ.

ރައީސުލްޖުމްހޫރިއްޔާގެ ވާހަކަފުޅުގައި ވިދާޅުވީ، ކުރިއަށް މިއޮތް ދައުރު އެންމެ މުހިންމު އަމާޒަކީ އާ ޒުވާނުންނަށް، އެ ޖީލަށް ފުރުސަތު ހުޅުވާލައި، ރާއްޖޭގެ ކަންކަމުގައި ބަސްބުނެ، ހަރަކާތްތެރިވުމުގެ ޖާގަ ޒުވާނުންނަށް މިހާރަށްވުރެ ރަނގަޅަށް ހޯދައި ދިނުމާއި، އަމާން މުޖުތަމައެއް ގާއިމް ކުރުމަށް ފަށާފައިވާ މަސައްކަތާއިގެން ކުރިޔަށް ދިޔުން ކަމަށެވެ.

ރިޔާސީ އިންތިޚާބުގެ ކެމްޕޭނަށް ރައީސުލްޖުމްހޫރިއްޔާ މާފުއްޓަށް ވަޑައިގެންނެވުމުން އެރަށުގެ ރައްޔިތުން ވަނީ ސަޤާފީ ހަރަކާތްތަކާއި އެކު އެމަނިކުފާނަށާއި އަރިހުގައި ވަޑައިގެންނެވި ވަފުދުގެ ބޭފުޅުންނަށް ހޫނު މަރުޙަބާއެއް ދަންނަވާފައެވެ.