ޖަރުމަން ބުންޑެސް ލީގާގެ ޗެމްޕިއަން، ބެޔާ ލެވަކޫސެން އިން އެއިންޓްރެޗް ފްރެންކްފާޓު 5-1 އިން ބަލިކޮށް، އެ ޓީމުން އެއްވެސް މެޗަކުން ބަލިނުވެ ދަމަހައްޓަމުން އަންނަ ރެކޯޑު އައުކޮށްފިއެވެ. ފްރެންކްފާޓުގައި ކުޅުނު މި މެޗުގެ ނަތީޖާއާއެކު، ލެވަކޫސެން މިހާރު މިވަނީ ބަލިނުވެ 48 މެޗު ހަމަކޮށްފައެވެ.

މި މެޗުގައި ފުރަތަމަ ލީޑު ނެގީ ލެވަކޫސެންއެވެ. މެޗުގެ 12 ވަނަ މިނެޓުގައި އެ ޓީމަށް ލީޑު ނަގައިދިނީ އާސެނަލް އިން ބަދަލުވި ގްރެނިޓް ޖަކާ، ޕެނަލްޓީ އޭރިޔާގެ ބޭރުގައި ހުރެފައި ފޮނުވާލި ބޯޅައަކުންނެވެ. އޭގެ 19 މިނެޓު ފަހުން ފްރެންކްފާޓުން މެޗުގެ ނަތީޖާ ހަމަހަމަކުރި ނަމަވެސް، ފުރަތަމަ ހާފު ނިމުމުގެ ކުރިން ޕެޓްރިކް ޝިކްގެ ގޯލަކުން ލެވަކޫސެން އަނެއްކާ ވެސް ލީޑު ނެގިއެވެ.

ލެވަކޫސެންގެ ބާކީ ގޯލުތައް ކާމިޔާބުކޮށްފައިވަނީ ދެވަނަ ހާފުގައެވެ. މީގެ ތެރޭގައި ދެ ޕެނަލްޓީ ގޯލު ވެސް ހިމެނެއެވެ. މި ތަނުން އެއް ޕެނަލްޓީ ޕަލަސިއޯސް ކާމިޔާބުކުރިއިރު ދެވަނަ ޕެނަލްޓީ ކާމިޔާބުކުރީ ބޮނިފޭސްއެވެ. މީގެ އިތުރުން،. މި ހާފުގައި ދެން ގޯލެއް ކާމިޔާބުކުރީ ފްރިމްޕޮންއެވެ.

Advertisement

މި މެޗާ އެކު، ލެވަކޫސެން އިން މި ސީޒަނުގައި މިހާތަނަށް 134 ގޯލު ކާމިޔާބުކޮށްފައިވެއެވެ.